میچ جیتنے پر بہت خوش ہوں، کریڈٹ پوری ٹیم کو جاتا ہے: شان مسعود

ملتان( سپورٹس ڈیسک)قومی ٹیسٹ ٹیم کے کپتان شان مسعود نے ویسٹ انڈیز کے خلاف شاندار فتح پر خوشی کا اظہار کرتے ہوئے کہا کہ جیت کا کریڈٹ پوری ٹیم کو جاتا ہے۔ ویسٹ انڈیز کے خلاف پہلے ٹیسٹ میچ کے بعد گفتگو کرتے ہوئے انہوں نے کہا کہ سپنرز نے بہترین کھیل کا مظاہرہ کیا، خصوصا ساجد خان، نعمان علی اور ابرار احمد کی بالنگ شاندار تھی۔شان مسعود نے مزید کہا کہ پہلی اننگز میں سعود شکیل اور محمد رضوان کی پارٹنرشپ اہمیت کی حامل رہی۔ بیٹنگ یونٹ اور بیٹنگ کوچ کو بھی اس فتح کا کریڈٹ جاتا ہے۔ انہوں نے تسلیم کیا کہ ہر ڈیپارٹمنٹ میں خامیاں ہوتی ہیں، اور اس پچ پر سب سے بڑی مشکل بیٹنگ کرنا تھا۔کپتان کا کہنا تھا کہ پرفارمنس کبھی کبھار بیس یا تیس رنز کی شکل میں بھی ہو سکتی ہے، لیکن اگر ہم خود کو بہترین بنانا چاہتے ہیں تو ہمیں خود کو مزید بہتر بنانا ہوگا۔ انہوں نے کہا کہ ہم نے بہت سی چیزوں کو نوٹ کیا ہے اور یہ ایک ٹیم گیم ہے، جس میں ایک شعبے کو دوسرے شعبے کے لیے قربانی دینی پڑتی ہے۔شان مسعود نے یہ بھی کہا کہ انہیں اچھے یا برے کی فکر نہیں ہے، بلکہ ٹف کنڈیشنز میں وقت گزارنا بھی ایک اہم کام ہے۔ انہوں نے مزید کہا کہ ہمیں اچھے پلیئرز بنانا ہوں گے تاکہ مستقبل میں مزید کامیابیاں حاصل کر سکیں۔