کراچی: انٹرمیڈیٹ سال اول کے پرچوں کی سکروٹنی فیس ختم

کراچی( اباسین خبر)کراچی میں انٹرمیڈیٹ سال اول کے پرچوں کی سکروٹنی پر عائد فیس ختم کردی گئی ہے۔اعلی ثانوی تعلیمی بورڈ کراچی نے انٹرمیڈیٹ حصہ اول کے سالانہ امتحانات برائے 2024 کے سائنس پری میڈیکل، پری انجینئرنگ، سائنس جنرل، کامرس پرائیویٹ، آرٹس پرائیویٹ اور ہوم اکنامکس گروپس کے نتائج سے غیرمطمئن طلبہ کے لیے سکروٹنی فیس ختم کرنے کا اعلان کیا ہے۔اس سہولت کے تحت طلبہ سکروٹنی کے لئے بغیر کسی فیس کے درخواست دے سکتے ہیں۔ طلبہ کی سہولت کے لیے انٹر بورڈ کی انکوائری پر طلبا کے لیے خصوصی کانٹرز قائم کیے گئے ہیں جبکہ طالبات کے لیے بھی سہولت مرکز پر الگ کانٹرز موجود ہیں، تاکہ وہ سکروٹنی فارم جمع کروانے میں کسی مشکل کا سامنا نہ کریں۔ناظم امتحانات کو سکروٹنی 30 روز میں مکمل کرنے کے لیے ہدایات جاری کر دی گئی ہیں، اور طلبہ سکروٹنی فارم انٹر بورڈ کی آفیشل ویب سائٹ www.biek.edu.pk سے ڈان لوڈ کر سکتے ہیں۔انٹرمیڈیٹ حصہ اول کے امتحانات برائے 2024 کے نتائج پر طلبہ کی شکایات کے ازالے کے لیے سینئر اساتذہ پر مشتمل انکوائری کمیٹی بھی تشکیل دی جا چکی ہے۔