مغربی کنارے میں پانی کی پائپ لائن تباہ، فلسطینی گاؤں کو فراہمی منقطع

غزہ ( مانیٹرنگ ڈیسک)مقبوضہ مغربی کنارے: غیرقانونی اسرائیلی آبادکاروں نے ام صفا گاؤں کو پانی فراہم کرنے والی مرکزی پائپ لائن کو تباہ کر دیا، جس کے باعث علاقے میں پانی کی فراہمی مکمل طور پر بند ہو گئی ہے۔میڈیا رپورٹس کے مطابق آبادکاروں نے گاؤں کے اطراف بلڈوزنگ کرتے ہوئے نہ صرف زمین ہموار کی بلکہ پانی کی سپلائی لائن بھی نقصان پہنچایا، جس سے مقامی آبادی کو شدید مشکلات کا سامنا ہے۔رپورٹس میں کہا گیا ہے کہ یہ کارروائی غیرقانونی آبادکاری کے توسیعی منصوبے کے تحت کی گئی، جس کا مقصد علاقے میں نئی سڑک اور بستیوں کی تعمیر ہے۔ذرائع کے مطابق شدت پسند گروہ نے آبادکاری کے مزید توسیعی منصوبوں کے لیے مالی معاونت حاصل کرنے کی بھی کوشش کی ہے۔پائپ لائن کی تباہی کے بعد ام صفا گاؤں میں پانی کی فراہمی معطل ہو گئی ہے، جبکہ مقامی افراد کو روزمرہ ضروریات کے لیے شدید مشکلات کا سامنا ہے۔مقامی ذرائع کا کہنا ہے کہ اس نوعیت کے اقدامات کے باعث فلسطینی کسانوں کو اپنی زمینوں تک رسائی میں بھی رکاوٹوں کا سامنا ہے۔