امریکا ایران کشیدگی: برطانوی رپورٹ میں عالمی جوہری خطرات کے خدشات کا انکشاف

لندن( مانیٹرنگ ڈیسک)ایک برطانوی تجزیاتی رپورٹ میں انکشاف کیا گیا ہے کہ امریکا اور ایران کے درمیان کشیدگی کے دوران جوہری تصادم کے خدشات میں اضافہ ہوا تھا۔رپورٹ کے مطابق سابق امریکی صدر ڈونلڈ ٹرمپ کی جانب سے ایران کے حوالے سے سخت بیانات نے نہ صرف مشرقِ وسطیٰ بلکہ یورپ اور ایشیا میں بھی سنگین تشویش پیدا کی۔سفارتی حلقوں میں یہ خدشہ ظاہر کیا گیا کہ اگر تنازع مکمل جنگ کی شکل اختیار کرتا تو اس کے اثرات عالمی سطح پر پھیل سکتے تھے، جن میں توانائی بحران، علاقائی جنگوں میں شدت اور ممکنہ طور پر جوہری تصادم جیسے خطرات شامل تھے۔برطانوی رپورٹ میں کہا گیا ہے کہ ایران کا جوہری پروگرام، اسرائیل کی سکیورٹی صورتحال اور امریکا کی سخت پالیسیوں نے خطے کو انتہائی حساس مرحلے میں پہنچا دیا تھا۔ بعض یورپی حکام کے مطابق معمولی غلطی بھی بڑے بحران کو جنم دے سکتی تھی۔رپورٹ میں مزید کہا گیا کہ جاپان، چین اور جنوبی کوریا سمیت ایشیائی ممالک آبنائے ہرمز اور مشرقِ وسطیٰ سے توانائی کی سپلائی متاثر ہونے کے باعث شدید تشویش میں مبتلا تھے۔تاہم امریکی حکام نے ان خدشات کو مسترد کرتے ہوئے مؤقف اختیار کیا کہ واشنگٹن کا مقصد صرف ایران پر دباؤ بڑھانا تھا، نہ کہ جنگ یا کسی جوہری تصادم کی طرف جانا۔