ایران کی متحدہ عرب امارات کو اسرائیل سے تعلقات پر سخت تنبیہ، خطے میں سفارتی کشیدگی میں اضافہ

تہران( مانیٹرنگ ڈیسک)ایران نے متحدہ عرب امارات کو اسرائیل کے ساتھ بڑھتے ہوئے تعلقات پر سخت تنبیہ کرتے ہوئے کہا ہے کہ ابوظہبی کو اسرائیل کی پالیسیوں اور منصوبوں کا حصہ بننے سے گریز کرنا چاہیے۔ اس بیان کے بعد خطے میں نئی سفارتی کشیدگی کے امکانات مزید بڑھ گئے ہیں۔قطری میڈیا رپورٹس کے مطابق ایران کی اعلیٰ عسکری قیادت سے تعلق رکھنے والے ایک سینئر عہدیدار نے کہا ہے کہ تہران متحدہ عرب امارات اور اسرائیل کے درمیان بڑھتے ہوئے روابط سے مکمل طور پر آگاہ ہے۔ انہوں نے واضح کیا کہ ایران نے ابوظہبی کے ساتھ دوستی کے دروازے بند نہیں کیے، تاہم ایران کے صبر کی بھی ایک حد ہے۔ایرانی عہدیدار کے مطابق متحدہ عرب امارات کو اسرائیل کی پالیسیوں اور خطے میں اس کے مبینہ منصوبوں سے دور رہنا چاہیے، کیونکہ ایسی شمولیت پورے خطے میں عدم استحکام کا سبب بن سکتی ہے۔رپورٹس کے مطابق ماضی میں امریکا اور اسرائیل کی جانب سے ایران کے خلاف کشیدگی کے دوران متحدہ عرب امارات بھی بعض حملوں کی زد میں آیا تھا، جبکہ بعض ذرائع نے یہ دعویٰ بھی کیا ہے کہ امارات نے ایران مخالف سرگرمیوں میں کسی نہ کسی حد تک کردار ادا کیا۔ تاہم ان دعوؤں کی آزاد تصدیق نہیں ہو سکی۔اس سے قبل ایران کے وزیر خارجہ بھی متحدہ عرب امارات کے رویے پر تنقید کر چکے ہیں۔ ایک علاقائی اجلاس میں انہوں نے کہا تھا کہ ایران کے خلاف کارروائیوں کے دوران بعض پڑوسی ممالک نے خاموشی اختیار کی، جس پر تہران کو تحفظات ہیں۔دوسری جانب اسرائیلی میڈیا میں یہ دعویٰ بھی سامنے آیا تھا کہ حالیہ کشیدگی کے دوران اسرائیلی قیادت نے خفیہ طور پر متحدہ عرب امارات کا دورہ کیا، تاہم اماراتی حکام نے ان خبروں کی سختی سے تردید کی ہے۔ماہرین کے مطابق ایران اور متحدہ عرب امارات کے درمیان بڑھتی ہوئی لفظی کشمکش خطے میں پہلے سے موجود سفارتی تناؤ کو مزید بڑھا سکتی ہے، خصوصاً ایسے وقت میں جب مشرق وسطیٰ پہلے ہی مختلف طاقتوں کے درمیان کشیدگی کا مرکز بنا ہوا ہے۔