فہد مصطفیٰ کا قوی خان کو خراجِ عقیدت، لیجنڈز کی میراث ہمیشہ زندہ رہتی ہے

کراچی ( شو بز ڈیسک) پاکستانی اداکار فہد مصطفیٰ نے سینئر اداکار قوی خان کو خراجِ عقیدت پیش کرتے ہوئے کہا ہے کہ عظیم فنکار دنیا سے رخصت ہونے کے باوجود اپنی خدمات اور یادوں کے ذریعے ہمیشہ زندہ رہتے ہیں۔فہد مصطفیٰ نے سوشل میڈیا پر اپنی فلم ’’قائدِاعظم زندہ باد‘‘ کا ایک یادگار منظر شیئر کیا اور لکھا کہ لیجنڈز کبھی نہیں مرتے، ان کی میراث ہمیشہ برقرار رہتی ہے۔انسٹاگرام پر شیئر کیے گئے اس منظر میں قوی خان بارش کے دوران قائدِاعظم محمد علی جناح کی تصویر والا ایک فریم تھامے دکھائی دیتے ہیں۔ اس منظر میں مرحوم اداکار کی متاثر کن اداکاری کا ایک جذباتی پہلو نمایاں ہے۔فلم میں قوی خان نے منور مہاراج کا کردار ادا کیا تھا، جو فہد مصطفیٰ کے کردار انسپکٹر گلاب کے والد تھے۔ ان کا کردار دیانت داری اور ذمہ داری کی علامت تھا، جو ابتدا میں ان کے بیٹے کے بدعنوان رویے سے متضاد نظر آتا ہے۔2022ء میں ریلیز ہونے والی اس ایکشن کامیڈی فلم میں ماہرہ خان نے بھی اہم کردار ادا کیا تھا۔ قوی خان کی یہ فلم مارچ 2023ء میں انتقال سے قبل ان کی آخری فلمی پرفارمنسز میں سے ایک تھی۔