ایلون مسک دنیا کے پہلے کھرب پتی بن گئے، دولت 1.1 ٹریلین ڈالر سے تجاوز کر گئی

واشنگٹن( مانیٹرنگ ڈیسک)ٹیکنالوجی کمپنیوں کے بانی ایلون مسک تاریخ کے پہلے ایسے شخص بن گئے ہیں جن کی مجموعی دولت ایک کھرب ڈالر سے تجاوز کر گئی ہے۔میڈیا رپورٹس کے مطابق یہ سنگِ میل بنیادی طور پر ان کی خلائی کمپنی اسپیس ایکس کے ریکارڈ ساز ابتدائی عوامی حصص کے اجرا کے بعد حاصل ہوا، جس کے ذریعے کمپنی کے حصص عام سطح پر فروخت کیے گئے۔رپورٹس کے مطابق اسپیس ایکس کے تقریباً 75 ارب ڈالر کے ابتدائی عوامی اجرا کے بعد کمپنی کی مجموعی مالیت 1.7 ٹریلین ڈالر سے تجاوز کر گئی، جس سے ایلون مسک کے حصص کی قدر میں نمایاں اضافہ ہوا اور ان کی مجموعی دولت 1.1 ٹریلین ڈالر سے بڑھ گئی۔ایلون مسک کی دولت صرف اسپیس ایکس تک محدود نہیں بلکہ ان کے دیگر بڑے اثاثوں میں نیورالنک، ایکس اے آئی، ٹیسلا اور دی بورنگ کمپنی میں حصص بھی شامل ہیں، تاہم حالیہ اضافہ بنیادی طور پر اسپیس ایکس کی بڑھتی ہوئی قدر کا نتیجہ ہے۔ماہرین کے مطابق یہ دولت زیادہ تر "کاغذی دولت" ہے، جو کمپنیوں کے حصص کی مارکیٹ ویلیو پر منحصر ہوتی ہے اور مارکیٹ میں تبدیلی کے ساتھ اس میں کمی یا اضافہ ہو سکتا ہے۔