وینزویلا میں زلزلوں سے بڑی تباہی کے مناظر سامنے آ گئے

وینزویلا( مانیٹرنگ ڈیسک)وینزویلا گزشتہ جمعرات دو طاقتور زلزلوں سے لرز اٹھا، جن کے نتیجے میں وسیع پیمانے پر تباہی ہوئی۔ سب سے زیادہ نقصان لا گوائیرا میں ریکارڈ کیا گیا، جبکہ زلزلوں سے پہلے اور بعد کی سیٹلائٹ تصاویر نے تباہی کی شدت کو نمایاں کر دیا ہے۔24 جون کی سہ پہر وینزویلا میں صرف 39 سیکنڈ کے وقفے سے دو شدید زلزلے آئے، جن کی شدت ریکٹر اسکیل پر 7 سے زائد ریکارڈ کی گئی۔ماہرین کے مطابق اس قسم کے واقعے کو "دوہرے زلزلوں کا واقعہ" کہا جاتا ہے، جس میں ایک ہی علاقے میں مختصر وقفے کے دوران آنے والے دو طاقتور زلزلے تباہی کی شدت میں کئی گنا اضافہ کر دیتے ہیں۔رپورٹس کے مطابق ہلاکتوں کی تعداد ایک ہزار سے تجاوز کر چکی ہے، جبکہ 50 ہزار سے زائد افراد لاپتہ بتائے جا رہے ہیں۔حکام کا کہنا ہے کہ ملبے تلے دبے افراد کی تلاش اور امدادی کارروائیاں تیزی سے جاری ہیں، تاہم عمارتوں کے بڑے پیمانے پر منہدم ہونے کے باعث ہلاکتوں میں مزید اضافے کا خدشہ موجود ہے۔زلزلوں کے نتیجے میں بلند و بالا رہائشی عمارتیں، مکانات، گودام اور متعدد دیگر تعمیرات زمین بوس ہو گئیں۔سیٹلائٹ تصاویر میں واضح طور پر دیکھا جا سکتا ہے کہ جہاں کبھی عمارتوں کی قطاریں موجود تھیں، وہاں اب اینٹوں، پتھروں اور کنکریٹ کے ملبے کے ڈھیر دکھائی دے رہے ہیں۔سب سے زیادہ متاثر ہونے والے علاقوں میں لا گوائیرا سرفہرست ہے، جبکہ کارابالیدا اور دیگر مقامات پر بھی متعدد عمارتیں منہدم ہو چکی ہیں اور بڑی تعداد میں افراد کے جاں بحق یا لاپتہ ہونے کی اطلاعات موصول ہوئی ہیں۔