پی ٹی آئی والے صرف انتقام اور نفرت کی سیاست کرتے ہیں:اختیار ولی خان

نوشہرہ( اباسین خبر) ن لیگ کے رہنما اختیار ولی خان نے نوشہرہ میں ایک تقریب سے خطاب کرتے ہوئے خیبر پختونخوا کے عوام کی مشکلات اور صوبے کی حکومت کی کارکردگی پر سخت تنقید کی۔ انہوں نے کہا کہ خیبر پختونخوا کے عوام بنیادی سہولتوں سے محروم ہیں اور صوبے کے 3 ہزار اسکولوں میں پینے کے پانی کی سہولت تک نہیں ہے۔اختیار ولی خان نے مزید کہا کہ حکومت کی طرف سے اسکولوں سے متعلق متعدد بل پاس کیے گئے ہیں، لیکن ان بلوں کے پیسے اصل میں عوام تک نہیں پہنچ پاتے۔ ان کا کہنا تھا کہ یہ پیسے صرف حکومتی عہدیداروں کے اکانٹس میں جاتے ہیں، اور عوام کو کچھ نہیں ملتا۔انہوں نے پاکستان تحریک انصاف (پی ٹی آئی) کی حکومت پر بھی کڑی تنقید کی، اور کہا کہ پی ٹی آئی والے صرف انتقام اور نفرت کی سیاست کرتے ہیں اور عوام کے مسائل کے حل کے لیے کوئی ٹھوس اقدامات نہیں کرتے۔اختیار ولی خان نے صوبے کی یونیورسٹیوں کی حالت زار پر بھی بات کی، اور کہا کہ یونیورسٹیاں فنڈز کی کمی کی وجہ سے بند ہو رہی ہیں۔ انہوں نے یہ بھی کہا کہ پی ٹی آئی کی حکومت نے “تبدیلی” کا جھوٹا دعوی کیا تھا، لیکن حقیقت میں کوئی تبدیلی نظر نہیں آئی۔اختیار ولی خان کا کہنا تھا کہ خیبر پختونخوا کے وزیرِ اعلی صوبے کے عوام کی فلاح و بہبود کے لیے کام نہیں کر رہے، اور یہ کہ ہمیں اپنی سمت کا تعین کرنا ہو گا تاکہ عوام کے مسائل حل کیے جا سکیں۔