اسلام نے چار شادیوں کی اجازت دی ہے، لیکن عائزہ سے محبت اور احترام کی وجہ سے مزید شادی نہیں کرونگا:دانش تیمور

کراچی ( شوبز ڈیسک)پاکستان شوبز کے معروف اداکار اور میزبان دانش تیمور نے حالیہ بیان پر وضاحت پیش کی ہے جس میں انہوں نے چار شادیوں کی اجازت سے متعلق اپنے خیالات کا اظہار کیا تھا۔ رمضان ٹرانسمیشن کے دوران دانش نے اپنی اہلیہ عائزہ خان کو مدعو کیا تھا اور اس موقع پر کہا تھا کہ اسلام نے انہیں چار شادیوں کی اجازت دی ہے، لیکن وہ اپنی اہلیہ عائزہ سے محبت اور احترام کی وجہ سے ایسا نہیں کر رہے۔دانش کا کہنا تھا، “آج میں یہ بات عائزہ کے ساتھ اور سب کے سامنے کہہ رہا ہوں، مجھے اللہ نے چار شادیوں کی اجازت دی ہے اور یہ میرا حق ہے، جو مجھ سے کوئی چھین نہیں سکتا۔ لیکن میں ایسا نہیں کر رہا، یہ میری عائزہ کے لیے محبت اور احترام ہے کہ فی الحال میں ان کے ساتھ ہوں۔”دانش کے اس بیان کو سوشل میڈیا پر شدید تنقید کا سامنا کرنا پڑا، جس کے بعد انہوں نے ایک وضاحتی بیان جاری کیا۔ دانش نے کہا، “میں نے یہ اس لیے کہا کہ زندگی اور موت کا کچھ پتا نہیں، کیا معلوم اگلے لمحے میں زندہ رہوں یا نہ رہوں۔”ایک نئی ویڈیو میں دانش تیمور نے کہا، “میں آپ سے کہوں گا کہ سب کو یہ لفظ ‘فی الحال’ استعمال کرنا چاہیے۔ میں آج بھی اپنے بیان پر قائم ہوں کہ مجھے چار شادیوں کی اجازت ہے، لیکن میں اس لیے نہیں کر رہا کیونکہ مجھے عائزہ سے محبت ہے اور فی الحال میں اس کے ساتھ ہوں۔”اداکار نے مزید کہا، “یہ جو لفظ ہے کہ ‘میں ہمیشہ ہوں’، ہمیشہ کوئی نہیں رہتا، کسی کے ساتھ۔”دانش تیمور کا یہ وضاحتی بیان سوشل میڈیا پر وائرل ہو چکا ہے، جہاں مداحوں نے اس پر مختلف ردعمل کا اظہار کیا۔