ڈیجیٹل لرننگ کے ذریعے نوجوانوں کو ترقی کے مواقع فراہم کر رہے ہیں:مریم نواز

لاہور( اباسین خبر)وزیر اعلی پنجاب مریم نواز شریف نے کہا ہے کہ ڈیجیٹل لرننگ کے دور میں ترقی ٹیکنالوجی اور جدید تعلیم سے مشروط ہے۔ڈیجیٹل لرننگ ڈے پر اپنے پیغام میں وزیر اعلی نے کہا کہ پنجاب کے نوجوانوں کو جدید دنیا کے تقاضوں سے ہم آہنگ کرنے کے لیے بھرپور مواقع فراہم کیے جا رہے ہیں۔ سی ایم لیپ ٹاپ سکیم پنجاب کے طلبہ کے لیے ایک انقلابی قدم ثابت ہو گا۔مریم نواز نے مزید کہا کہ پنجاب میں نوجوانوں کو انٹرنیشنل مارکیٹ بیسڈ ایڈوانس آئی ٹی ٹریننگ پروگرامز کرائے جا رہے ہیں، جن میں مصنوعی ذہانت (AI)، سافٹ ویئر ڈویلپمنٹ اور فری لانسنگ جیسے کورسز شامل ہیں۔ انہوں نے کہا کہ سرکاری سکولوں میں سمارٹ کلاس رومز اور ڈیجیٹل لیبز قائم کی جا رہی ہیں تاکہ جدید ٹیکنالوجی سے روایتی تعلیم کو زیادہ مثر بنایا جا سکے۔وزیر اعلی نے لاہور میں پاکستان کے پہلے نواز شریف آئی ٹی سٹی کے قیام کا بھی ذکر کیا، جہاں ٹوئین ٹاورز اسی سال مکمل کر لیے جائیں گے اور ایک پلگ اینڈ پلے کال سینٹر ہب بھی قائم کیا جائے گا۔ ان کا کہنا تھا کہ نواز شریف آئی ٹی سٹی میں نوجوانوں کو آئی ٹی ایجوکیشن اور روزگار کے نئے مواقع ملیں گے، اور عالمی سطح کی انفارمیشن ٹیکنالوجی یونیورسٹیاں بھی کیمپس قائم کرنے میں دلچسپی ظاہر کر رہی ہیں۔