کراچی میں ‘نو ہیلمٹ نو انٹری’ کی نئی پالیسی، آئی آئی چندریگر روڈ پر ہیلمٹ کی پابندی عائد

کراچی( اباسین خبر)کراچی کی شہری انتظامیہ نے آئی آئی چندریگر روڈ کو ‘نو ہیلمٹ نو انٹری’ کا ماڈل بنانے کا فیصلہ کیا ہے، جس کے تحت اس شاہراہ پر موٹر سائیکل سواروں کے لیے ہیلمٹ پہننا لازمی ہوگا۔سڑک پر ٹریفک کا نظم و ضبط برقرار رکھنے کے لیے ڈیلینیٹرز بھی نصب کیے گئے ہیں۔ آئی آئی چندریگر روڈ روزانہ ہزاروں گاڑیوں کے علاوہ بڑی تعداد میں موٹر سائیکلوں کی آمد و رفت کا مرکز ہے، اور صبح و شام کے مصروف اوقات میں موٹر سائیکل سواروں کی غیر محتاط رائیڈنگ کے سبب حادثات کی شرح بھی بڑھتی ہے۔یہ ہیلمٹ کی پابندی فی الحال آئی آئی چندریگر روڈ پر متعارف کرائی گئی ہے، جسے بتدریج شہر کی دیگر مرکزی شاہراہوں پر بھی نافذ کیا جائے گا۔میئر کراچی مرتضی وہاب نے کہا ہے کہ اس اقدام کا مقصد جان لیوا حادثات کی روک تھام ہے، اور مستقبل میں شہر کی تمام مرکزی شاہراہوں پر موٹر سائیکل سواروں کے لیے ہیلمٹ پہننا لازمی ہوگا۔