اقوام متحدہ کا بلوچستان میں جعفر ایکسپریس کی ہائی جیکنگ کی شدید مذمت ، یرغمالیوں کی فوری رہائی کا مطالبہ

نیویارک( مانیٹرنگ ڈیسک) اقوام متحدہ کے سیکریٹری جنرل انتونیو گوتریس نے پاکستان کے صوبہ بلوچستان میں جعفر ایکسپریس کی ہائی جیکنگ کی شدید مذمت کرتے ہوئے یرغمال بنائے گئے افراد کی فوری رہائی کا مطالبہ کیا ہے۔اقوام متحدہ کے ترجمان اسٹیفان دوجارک کے مطابق گوتریس نے کہا کہ شہریوں پر حملے کسی صورت قابل قبول نہیں ہیں اور عالمی برادری کو ایسے واقعات کی روک تھام کے لیے فوری طور پر اقدامات کرنے چاہئیں۔یہ حملہ منگل کے روز بلوچستان میں ہوا، جہاں مبینہ بلوچ مسلح گروپ نے جعفر ایکسپریس پر حملہ کیا، جو کوئٹہ سے پشاور جا رہی تھی اور اس میں تقریبا 500 مسافر سوار تھے۔ حملہ گدالار اور پیرو کونڑی کے درمیان کیا گیا، جس کے بعد ٹرین کو پٹری سے اتار کر قبضہ کر لیا گیا۔بلوچستان لبریشن آرمی (BLA) نے اس حملے کی ذمہ داری قبول کی اور دعوی کیا کہ انہوں نے چھ سیکیورٹی اہلکاروں کو ہلاک کر دیا اور 100 سے زائد افراد کو یرغمال بنا لیا، جن میں سیکیورٹی اہلکار بھی شامل ہیں۔ BLA نے دھمکی دی کہ اگر پاکستانی فوج نے آپریشن کیا تو تمام یرغمالیوں کو قتل کر دیا جائے گا۔