اسلامی تعاون تنظیم کا عرب منصوبے کے تحت غزہ کی تعمیر نو کی حمایت کا اعلان

جدہ ( مانیٹرنگ ڈیسک)اسلامی تعاون تنظیم (OIC) نے عرب منصوبے کے تحت غزہ کی تعمیر نو کی حمایت کا اعلان کیا ہے۔ جدہ میں اسلامی تعاون تنظیم کے وزرائے خارجہ کے اجلاس میں یہ فیصلہ کیا گیا، جس میں پاکستان کی نمائندگی نائب وزیرِ اعظم اور وزیرِ خارجہ اسحاق ڈار نے کی۔ اجلاس میں رکن ممالک نے غزہ کی تعمیر نو کے عرب منصوبے کی حمایت کی۔او آئی سی کے سربراہ حسین ابراہیم طحہ نے اس بات پر زور دیا کہ عرب لیگ غزہ کی تعمیر نو کے منصوبے کی حمایت کرتی ہے اور فلسطینی عوام کی جبرا نقل مکانی کے بیانات کو مسترد کرتی ہے۔ وزیرِ خارجہ اسحاق ڈار نے اجلاس میں کہا کہ اسرائیل کو فلسطینیوں پر مظالم بند کرنا ہوں گے، اور پاکستان ہمیشہ فلسطینی بھائیوں کے ساتھ کھڑا رہے گا۔یاد رہے کہ قاہرہ میں حالیہ او آئی سی کے ہنگامی اجلاس میں مصر نے غزہ سے متعلق ایک منصوبہ پیش کیا تھا، جس میں 53 ارب ڈالر کے فنڈز سے پانچ سال میں فلسطین میں لاکھوں مکانات، تجارتی بندرگاہ اور ایئرپورٹ کی تعمیر کی تجویز دی گئی۔ اس منصوبے میں فلسطینی علاقوں میں انتخابات اور دو ریاستی حل کی کوششیں بھی شامل ہیں۔ اجلاس کے اختتام پر عرب لیگ کے سیکرٹری جنرل احمد ابوالغیط نے اعلان کیا کہ یہ منصوبہ اب ایک عرب منصوبہ بن چکا ہے۔اس سے قبل، امریکی صدر ڈونلڈ ٹرمپ نے ایک متنازعہ منصوبہ پیش کیا تھا جس میں فلسطینیوں کو غزہ سے نکال کر دوسرے ممالک میں منتقل کرنے کی تجویز دی گئی تھی۔