امریکا، سینیگال اور قبرص سمیت 8 ممالک سے مزید 37 پاکستانی باشندے ڈی پورٹ

کراچی( اباسین خبر)امریکا، سینیگال اور قبرص سمیت 8 ممالک سے مزید 37 پاکستانی باشندوں کو ڈی پورٹ کر دیا گیا، جن میں سے 3 شہریوں کو بلیک لسٹ ہونے کی وجہ سے حراست میں لے لیا گیا۔امیگریشن ذرائع کے مطابق، امریکا جانے والے ایک پاکستانی کا ویزہ منسوخ کر کے اسے واپس پاکستان بھیج دیا گیا، جبکہ قبرص پہنچنے والے ایک پاکستانی کو ناپسندیدہ قرار دے کر واپس بھیج دیا گیا۔ سینیگال میں انسانی سمگلنگ میں ملوث ایک پاکستانی شہری کو حراست میں لے کر واپس بھیج دیا گیا، اور برازیل میں بغیر دستاویزات کے پہنچنے والے پاکستانی کو بھی ڈی پورٹ کر دیا گیا۔سعودی عرب میں ویزہ منسوخ ہونے پر 2 پاکستانیوں کو بے دخل کیا گیا، جبکہ سعودی سسٹم میں ویزہ ریکارڈ نہ ہونے، بلیک لسٹ ہونے، منشیات، زائد المیعاد قیام، بھیک مانگنے، کفیل کے بغیر کام کرنے، کام سے مفرور، چوری کے الزامات اور پاسپورٹ گم ہونے پر 26 پاکستانیوں کو واپس بھیجا گیا۔متحدہ عرب امارات میں زائد المیعاد قیام اور بلیک لسٹ ہونے کی وجہ سے 3 پاکستانیوں کو بے دخل کیا گیا، ایران سے ایمرجنسی دستاویزات پر ایک پاکستانی کو واپس بھیجا گیا، جبکہ بحرین میں سکیورٹی رسک قرار دے کر ایک پاکستانی کو واپس بھیج دیا گیا۔