چیمپیئنز ٹرافی کا دوسرا سیمی فائنل آج نیوزی لینڈ اور جنوبی افریقا کے مابین ہوگا

لاہور( سپورٹس ڈیسک)آئی سی سی چیمپئنز ٹرافی 2025 کا پاکستان میں آج آخری مقابلہ ہوگا، جب نیوزی لینڈ اور جنوبی افریقہ کے درمیان دوسرا سیمی فائنل قذافی اسٹیڈیم لاہور میں کھیلا جائے گا۔ فاتح ٹیم دبئی میں بھارت کے ساتھ ٹائٹل کے لیے مقابلہ کرے گی۔دونوں ٹیموں کی بیٹنگ لائن اپ مضبوط ہے اور لاہور کی بیٹنگ کے لیے سازگار پچ پر بڑے اسکورز کی توقع کی جا رہی ہے۔ کیویز کے پاس مچل سینٹنر اور مائیکل بریسویل کی صورت میں دو اسپنرز ہیں، جبکہ جنوبی افریقہ ایک اسپنر کیشو مہاراج پر انحصار کرے گا۔جنوبی افریقا کے تجربہ کار بیٹر ڈیوڈ ملر کے لیے یہ ممکنہ طور پر آخری بڑا ایونٹ ہو سکتا ہے، جبکہ نیوزی لینڈ کے کین ولیمسن کا کردار اس میچ میں فیصلہ کن ثابت ہو سکتا ہے۔اب تک دونوں ٹیمیں آئی سی سی ٹورنامنٹس میں 11 بار آمنے سامنے آ چکی ہیں، جن میں سے 7 بار کیویز نے کامیابی حاصل کی۔ سن 2017 کے بعد سے دونوں کا صرف تین ون ڈے میچز میں سامنا ہوا ہے، جن میں 2 ورلڈ کپ اور ایک حالیہ ٹرائنگولر سیریز کا میچ شامل ہے۔