سردی کی شدت برقرار، شدید برفباری کے باعث بلوچستان کی رابطہ سڑکیں بند

لاہور( اباسین خبر)صوبائی دارالحکومت لاہور سمیت ملک بھر میں سردی کی شدت برقرار ہے۔ بارش اور برفباری کے بعد شمالی بالائی بلوچستان کی سڑکیں بند ہوگئیں، جب کہ آزاد کشمیر، گلگت بلتستان اور خیبرپختونخوا کے پہاڑی علاقوں میں وقفے وقفے سے برفباری جاری ہے۔ برفباری کے باعث متعدد بالائی علاقوں کا زمینی رابطہ منقطع ہوچکا ہے۔محکمہ موسمیات نے اسلام آباد اور گردونواح میں موسم سرد اور خشک رہنے کی پیشگوئی کی ہے، جبکہ خیبرپختونخوا کے بیشتر اضلاع میں بھی سرد اور خشک موسم، بالائی اضلاع میں شدید سرد رہنے کا امکان ہے۔ پنجاب کے بیشتر اضلاع میں سرد اور خشک موسم رہے گا، جبکہ مری، گلیات اور گردونواح میں شدید سردی اور جزوی ابر آلود موسم کی پیشگوئی ہے۔ بہاولنگر، بہاولپور، ملتان، رحیم یارخان، اوکاڑہ اور ساہیوال میں ہلکی سے درمیانی دھند کا امکان ہے۔سندھ کے بیشتر اضلاع میں سرد اور خشک موسم رہے گا، تاہم سکھر، موہنجو دڑو، شہید بینظیر آباد، لاڑکانہ اور گردونواح میں ہلکی دھند متوقع ہے۔ بلوچستان کے بیشتر اضلاع میں موسم سرد اور خشک، شمالی اضلاع میں شدید سرد رہنے کا امکان ہے، جبکہ کشمیر اور گلگت بلتستان میں موسم شدید سرد اور جزوی ابر آلود رہنے کی پیشگوئی ہے۔