پاکستان کیخلاف پہلا ون ڈے: جنوبی افریقا کا اہم کھلاڑی ٹیم کا حصہ نہیں ہوگا

لاہور( سپورٹس ڈیسک)جنوبی افریقا کی ون ڈے ٹیم کے کپتان ٹیمبا بووما پاکستان کے خلاف تین ایک روزہ میچز کی سیریز کے پہلے میچ میں پلیئنگ الیون کا حصہ نہیں ہوں گے۔ انہوں نے یہ فیصلہ پاکستان کے خلاف دو ٹیسٹ میچز کی سیریز کے پیش نظر اپنے ورک لوڈ کو مینیج کرنے کے لیے کیا ہے۔جنوبی افریقا کے لیے یہ میچز چیمپئنز ٹرافی سے قبل آخری موقع ہیں جب ان کا مکمل اسکواڈ دستیاب ہوگا۔ ایک روزہ اسکواڈ کے آٹھ کھلاڑی (ٹیمبا بووما، ایڈن مارکرم، ٹونی ڈی زورزی، ٹرِسٹن اسٹبز، رائن رکلٹن، مارکو جینسن، کیشو ماہراج اور کیگیسو رباڈا) سری لنکا کے خلاف دو ٹیسٹ میچز کی سیریز کا حصہ تھے، اور پاکستان کے خلاف ٹیسٹ میچز میں بھی ان کی شرکت متوقع ہے۔جنوبی افریقا کے فاسٹ بولرز کی انجری کے باعث ٹیم کو فاسٹ بولنگ لائن اپ پر تشویش ہے۔ وائن مولڈر (جن کی انگلی ٹوٹی ہوئی ہے) باکسنگ ڈے ٹیسٹ تک فٹ ہونے کی امید رکھتے ہیں، جبکہ کولہے اور گروئن میں انجری کے باعث لنگی اینگیڈی اور جیرالڈ کوٹزے جنوری تک ٹیم میں شامل نہیں ہو سکیں گے۔ اس کے علاوہ ناندرے برجر پورے سیزن کے لیے باہر ہو گئے ہیں۔اینرک نوکیے، جو رباڈا اور جینسن کی مدد کر سکتے تھے، اب ٹوٹے ہوئے پنجے کی وجہ سے ون ڈے اور ٹیسٹ دونوں فارمیٹس سے باہر ہو چکے ہیں۔