ملک میں ڈیجیٹل ادائیگیوں کے استعمال میں نمایاں اضافہ

کراچی( کامرس ڈیسک) سٹیٹ بینک پاکستان نے مالی سال 2025-26 کی تیسری سہ ماہی کے دوران ادائیگیوں سے متعلق رپورٹ جاری کر دی، جس کے مطابق ملک میں ڈیجیٹل ادائیگیوں کے رجحان میں نمایاں اضافہ ریکارڈ کیا گیا۔رپورٹ کے مطابق مالی سال 2025-26 کے ابتدائی تین ماہ کے دوران بینکاری نظام کے ذریعے 168.8 کھرب روپے مالیت کی 3.7 ارب ریٹیل ادائیگیاں کی گئیں، جن میں سے 92 فیصد ادائیگیاں ڈیجیٹل ذرائع کے ذریعے انجام پائیں۔ گزشتہ سال کے مقابلے میں ڈیجیٹل ادائیگیوں کی شرح میں 9 فیصد اضافہ ریکارڈ کیا گیا۔سٹیٹ بینک کے مطابق موبائل بینکنگ، انٹرنیٹ بینکنگ، اے ٹی ایم، فروختی مراکز اور برقی تجارت کے ذریعے ادائیگیوں کی تعداد 3.4 ارب تک پہنچ گئی، جبکہ ڈیجیٹل بٹوؤں کے ذریعے 68 کھرب روپے مالیت کی ادائیگیاں کی گئیں۔رپورٹ میں بتایا گیا کہ شاخوں کے بغیر بینکاری نظام، الیکٹرانک مالیاتی اداروں اور موبائل ایپلی کیشنز کے ذریعے 2.9 ارب ادائیگیاں کی گئیں، جبکہ ان ادائیگیوں کی مالیت 19 فیصد اضافے کے ساتھ 42 کھرب روپے تک پہنچ گئی اور تعداد میں 5 فیصد اضافہ ریکارڈ کیا گیا۔سٹیٹ بینک کے مطابق "راست" آن لائن ادائیگی نظام کے ذریعے 742.1 ملین لین دین کیے گئے، جن کی مجموعی مالیت 23.3 کھرب روپے رہی۔راست کے ذریعے فرد سے فرد ادائیگیوں کی تعداد 10 فیصد اضافے کے بعد 664 ملین تک پہنچ گئی، جبکہ فرد سے تاجر ادائیگیوں کی تعداد 36.3 ملین سے بڑھ کر 55.9 ملین ہو گئی۔رپورٹ کے مطابق ملک بھر میں 20 ہزار 232 بینک برانچوں اور 81 لاکھ 9 ہزار 397 بینکاری ایجنٹس نے کاؤنٹر خدمات فراہم کیں۔ بینک برانچوں کے ذریعے 128 ملین ادائیگیاں ریکارڈ کی گئیں جن کی مالیت 99.5 کھرب روپے رہی، جبکہ بینکاری ایجنٹس کے ذریعے 155 ملین ادائیگیاں کی گئیں جن کی مجموعی مالیت 1.1 کھرب روپے ریکارڈ کی گئی۔