شاہ رخ خان کی منیجر نے ممبئی میں 38 کروڑ سے زائد کے تین اپارٹمنٹس خرید لیے

ممبئی( شوبز ڈیسک) بالی ووڈ کے معروف اداکار شاہ رخ خان کی منیجر پوجا گرنانی اور ان کے اہل خانہ نے ممبئی کے علاقے باندرہ میں تین اپارٹمنٹس خرید لیے ہیں جن کی مجموعی مالیت اڑتیس کروڑ اکیس لاکھ روپے بتائی گئی ہے۔بھارتی میڈیا کے مطابق یہ جائیداد پوجا گرنانی، ان کے شوہر ہتیش پرکاش گرنانی اور والد موہن سیورام دادلانی کے نام پر خریدی گئی ہے۔ دستاویزات کے مطابق یہ اپارٹمنٹس کارٹر روڈ پر واقع ورون عمارت میں ہیں جہاں اس وقت تعمیر نو کا عمل جاری ہے۔یہ اپارٹمنٹس ایک نجی تعمیراتی کمپنی سے خریدے گئے ہیں اور عمارت کی بالائی منزلوں پر واقع ہیں۔ ہر اپارٹمنٹ کا اندرونی رقبہ ایک ہزار پانچ سو گیارہ مربع فٹ سے زائد ہے جبکہ بالکونی کا الگ رقبہ بھی شامل ہے۔ تینوں اپارٹمنٹس کا مجموعی رقبہ چار ہزار سات سو چھیہتر مربع فٹ بنتا ہے۔دستاویزات کے مطابق یہ جائیداد اکیس اپریل دو ہزار چھبیس کو رجسٹر کی گئی، جس پر دو کروڑ سولہ لاکھ روپے سے زائد اسٹامپ ڈیوٹی اور نوے ہزار روپے رجسٹریشن فیس ادا کی گئی۔ ان اپارٹمنٹس کے ساتھ چھ گاڑیوں کی پارکنگ کی سہولت بھی شامل ہے۔عمارت تاحال زیر تعمیر ہے اور توقع ہے کہ اس کی ملکیت دسمبر دو ہزار اٹھائیس میں فراہم کی جائے گی۔پوجا گرنانی طویل عرصے سے شاہ رخ خان کے ساتھ وابستہ ہیں اور ان کے پیشہ ورانہ امور، تشہیری معاہدوں اور عوامی تقریبات کی نگرانی میں اہم کردار ادا کرتی ہیں۔