دیر آپریشن کے بعد آر پی او مالاکنڈ کا پولیس جوانوں سے اظہارِ یکجہتی

مالاکنڈ( اباسین خبر) دیر میں دہشت گردوں کے خلاف کارروائی کے بعد ریجنل پولیس آفیسر (آر پی او) مالاکنڈ نے فرنٹ لائن پر تعینات پولیس اہلکاروں سے ملاقات کی اور ان کے حوصلے کو سراہتے ہوئے ان کی خدمات کی تعریف کی۔آر پی او مالاکنڈ نے آپریشن میں حصہ لینے والے جوانوں سے گفتگو کرتے ہوئے کہا کہ مشکل حالات ہی بہادری، عزم اور پیشہ ورانہ صلاحیتوں کا حقیقی امتحان ہوتے ہیں۔ انہوں نے اہلکاروں پر زور دیا کہ وہ اسی جذبے اور عزم کے ساتھ اپنی ذمہ داریاں انجام دیتے رہیں۔انہوں نے کہا کہ جس طرح انہیں اپنی وردی پر فخر ہے، اسی طرح ہر پولیس اہلکار بھی اپنی ذمہ داری اور وردی پر فخر محسوس کرتا ہے، اور پوری قوم اپنے سیکیورٹی اہلکاروں کی قربانیوں کو قدر کی نگاہ سے دیکھتی ہے۔دفاعی و سیکیورٹی امور کے ماہرین کا کہنا ہے کہ ملک میں امن و امان کے قیام کے لیے پولیس، پاک فوج اور دیگر قانون نافذ کرنے والے اداروں نے نمایاں قربانیاں دی ہیں، جبکہ اہلکاروں کا عزم دہشت گردی کے خلاف جاری کوششوں میں اہم کردار ادا کر رہا ہے۔ماہرین کے مطابق اعلیٰ پولیس قیادت کی فرنٹ لائن پر موجودگی اور جوانوں کی حوصلہ افزائی اس عزم کا اظہار ہے کہ ریاست عوام کے جان و مال کے تحفظ اور امن کے قیام کے لیے اپنی کوششیں جاری رکھے گی۔