الکا یاگنک کا پدما بھوشن وصول، صحت سے متعلق جذباتی پیغام

ممبئی( شوبز ڈیسک) بھارت کی معروف گلوکارہ الکا یاگنک نے ملک کا اعلیٰ عوامی اعزاز پدما بھوشن حاصل کیا۔ اس موقع پر انہوں نے اپنے مداحوں کے لیے ایک جذباتی پیغام جاری کیا جس میں اپنی صحت کے بارے میں بھی آگاہ کیا۔انسٹاگرام پر جاری بیان میں انہوں نے کہا کہ وہ گزشتہ دو سال سے عوامی تقریبات اور میڈیا سے دور ہیں کیونکہ وہ صحت کے مسائل کا سامنا کر رہی ہیں۔ انہوں نے بتایا کہ اس دوران مداحوں کی محبت، دعائیں اور مسلسل حمایت ان کے لیے بڑی طاقت بنی رہی۔الکا یاگنک نے کہا کہ پدما بھوشن حاصل کرنا ان کے لیے بے حد خوشی اور عاجزی کا لمحہ ہے۔ ان کے مطابق یہ اعزاز صرف ان کا نہیں بلکہ ان تمام سامعین کا ہے جنہوں نے ان کی آواز کو اپنی زندگی کا حصہ بنایا اور ہر دور میں ان کا ساتھ دیا۔انہوں نے مزید کہا کہ یہ لمحہ ان کے لیے اس لیے بھی خاص ہے کیونکہ یہ ان کی محنت کے ساتھ ساتھ اس طاقت کی بھی یاد دہانی ہے جو انہیں محبت اور امید سے حاصل ہوئی۔ گلوکارہ نے بتایا کہ وہ آہستہ آہستہ صحت یاب ہو رہی ہیں اور وہ اس تقریب میں صرف اپنے لیے نہیں بلکہ اپنے چاہنے والوں کے لیے شریک ہوئیں۔آخر میں انہوں نے کہا کہ انہوں نے صرف ایک اعزاز نہیں لیا بلکہ لاکھوں لوگوں کی محبت اور ساتھ کو محسوس کیا ہے جو ان کے سفر کا حصہ رہے ہیں۔یاد رہے کہ دو سال قبل الکا یاگنک نے انکشاف کیا تھا کہ انہیں وائرل انفیکشن کے باعث اچانک سماعت کا مسئلہ پیش آیا تھا جس کی وجہ سے وہ کچھ عرصے کے لیے موسیقی اور عوامی سرگرمیوں سے دور ہو گئی تھیں۔