صدر آصف علی زرداری کا خصوصی طیارہ کراچی سے اسلام آباد روانہ، طبیعت کی بہتری کی توقع

کراچی ( اباسین خبر)صدر پاکستان آصف علی زرداری کا خصوصی طیارہ، جو ایک ہفتے تک کراچی میں کھڑا رہا، بالاخر اسلام آباد روانہ ہو گیا۔ پاکستان ائیر فورس کا طیارہ “پاکستان ون” وزیراعظم کے سفر کے لیے مخصوص ہے، لیکن 29 مارچ کو صدر آصف علی زرداری نے عید الفطر اپنے آبائی شہر نواب شاہ منانے کے لیے اسی طیارے میں اسلام آباد سے نواب شاہ سفر کیا تھا۔عید کی رات صدر مملکت کی طبیعت خراب ہونے پر انہیں رات 4 بجے ہنگامی طور پر اسی طیارے میں کراچی منتقل کیا گیا، جہاں وہ مقامی اسپتال میں داخل ہو گئے اور زیر علاج ہیں۔ طبیعت کی بہتری کے بعد پیر تک انہیں اسپتال سے ڈسچارج کرنے کا اعلان کیا گیا تھا، تاہم وہ تاحال اسپتال میں ہی زیر علاج ہیں۔صدر کا خصوصی طیارہ پیر کی صبح 8 بجے کراچی کے جناح انٹرنیشنل ائیرپورٹ سے اسلام آباد روانہ ہوگیا۔