برازیل میں چمگادڑوں میں نیا کورونا وائرس دریافت، مرس وائرس سے مشابہت

نیو یارک (ہیلتھ ڈیسک)سائنس دانوں نے برازیل میں چمگادڑوں میں ایک نیا کورونا وائرس دریافت کیا ہے جو مہلک مرس وائرس سے مشابہت رکھتا ہے، تاہم انسانوں کو اس سے لاحق خطرات ابھی تک واضح نہیں ہیں۔سا پاولو اور سیرا کی ریاستوں کے محققین نے ہانگ کانگ یونیورسٹی کے سائنس دانوں کے ساتھ مل کر یہ نیا وائرس دریافت کیا ہے جس کی جینیاتی ترتیب مرس وائرس کے جینوم سے 72 فیصد مشابہ ہے۔مرس وائرس پہلی بار 2012 میں سعودی عرب میں دریافت ہوا تھا اور اس کے بعد 850 سے زائد اموات کے ساتھ دو درجن سے زائد ممالک میں اس کے کیسز رپورٹ ہو چکے ہیں۔تحقیق کی مصنفہ برونا اسٹیفنی سِلویریو کا کہنا تھا کہ اس وائرس کے انسانوں کو متاثر کرنے کی صلاحیت کا ابھی تک کوئی واضح ثبوت نہیں ملا ہے۔