پشتونوں اور بلوچوں کو ختم کرنے کی کوشش کرنے والے آج تاریخ کا حصہ بن چکے ہیں:محمود خان اچکزئی

کوئٹہ ( اباسین خبر) پشتونخوا ملی عوامی پارٹی کے چیئرمین محمود خان اچکزئی نے کہا ہے کہ پشتون بلوچ آج بھی اپنے اپنے تاریخی وطنوں میں آباد ہیں، ان کی نسلیں تباہ کرنے کی کوئی سازش کامیاب نہیں ہوگی، یہ بات انہوں نے تحریک تحفظ آئین پاکستان کے زیر اہتمام گرینڈ افطار پارٹی سے خطاب کرتے ہوئے کہی۔ انہوں نے سوشل میڈیا پر ایک ویڈیو میں کیے گئے دعووں کی سخت مذمت کرتے ہوئے کہا کہ “پشتونوں اور بلوچوں کو ختم کرنے کی کوشش کرنے والے آج تاریخ کا حصہ بن چکے ہیں”۔محمود خان اچکزئی نے 75 سالوں میں پاکستان کے مختلف قوموں کے درمیان زبان کی کمی کی طرف بھی اشارہ کیا اور کہا کہ ایک دوسرے کی زبان نہ سیکھنے کی بدولت ہم تقسیم کا شکار ہیں۔ انہوں نے کہا کہ پاکستان کا آئین ہی ہمیں ایک دوسرے کے قریب رکھتا ہے، لیکن آج اسے مذاق بنایا جا رہا ہے۔ان کا کہنا تھا کہ ہمیں اپنی گزشتہ غلطیوں کا اعتراف کرنا چاہیے جن کی وجہ سے ہم نے دہشت گردی کی تربیت دینے والے جنگوں میں حصہ لیا اور اپنے ملک کو دہشت گردوں کا مرکز بنایا۔ محمود خان اچکزئی نے اس بات پر زور دیا کہ دہشت گردی کی کوئی بھی قسم قابل مذمت ہے چاہے وہ فرد کرے، فرقہ کرے یا ریاست۔انہوں نے مزید کہا کہ عمران خان کو وزیر اعظم بنانے کی ذمہ داری ان ہی قوتوں پر ہے جنہوں نے آج ان کے خلاف کارروائیاں شروع کیں۔ یہ بھی کہا کہ وردی پوش اداروں کی مداخلت اور غیر آئینی حکومتوں کے ذریعے پاکستان کے سیاسی نظام کو نقصان پہنچایا جا رہا ہے۔