نعمان اعجاز کے ساتھ کام کر کے مجھے بہت کچھ سیکھنے کا موقع ملا: اداکار رعید محمد عالم

لاہور( شوبز ڈیسک)پاکستان شوبز انڈسٹری کے ابھرتے ہوئے اداکار رعید محمد عالم نے حالیہ انٹرویو میں سینئر اداکار نعمان اعجاز کے ساتھ اپنے تجربے کے بارے میں انکشاف کیا۔ رعید محمد عالم نے بتایا کہ جب وہ اپنے کیریئر کے ابتدائی دنوں میں نعمان اعجاز کے ساتھ کام کر رہے تھے، تو ایک سین میں انہیں رونا تھا لیکن بہت کوشش کے باوجود وہ آنکھوں میں آنسو نہیں لا سکے۔رعید نے بتایا کہ جب وہ ناکام رہے تو نعمان اعجاز نے انہیں اچانک تھپڑ مارا، جس کے بعد وہ چونک گئے اور ان کی آنکھوں میں فورا آنسو آ گئے۔ نعمان اعجاز نے فوری طور پر سین کی شوٹنگ مکمل کرنے کی ہدایت دی۔ رعید نے اس واقعے کو اپنے شوبز کیریئر میں ایک اہم موڑ قرار دیا اور بتایا کہ نعمان اعجاز کے ساتھ کام کر کے انہیں بہت کچھ سیکھنے کا موقع ملا۔یہ واقعہ نہ صرف رعید کی پیشہ ورانہ زندگی کا ایک اہم حصہ بن گیا بلکہ ان کے لیے ایک سبق آموز تجربہ بھی ثابت ہوا جس میں انہوں نے سینئر اداکار سے سیکھا کہ کس طرح پروفیشنلزم اور محنت کے ساتھ کام کو بہتر بنایا جا سکتا ہے۔