گندم سکینڈل میں ملوث 2 محکمہ خوراک کے افسران کی ضمانت مسترد، جیل بھیجنے کا حکم

پشاور( اباسین خبر)اینٹی کرپشن عدالت نے گندم سکینڈل میں ملوث محکمہ خوراک کے دو افسران کی ضمانت مسترد کرتے ہوئے انہیں جیل بھیجنے کا حکم دے دیا۔سپیشل جج اینٹی کرپشن عدالت پشاور میں محکمہ خوراک کے افسران عاطف خان اور جنید باچا کی ضمانت درخواستوں پر سماعت ہوئی، جہاں عدالت نے دونوں کی ضمانت مسترد کردی۔پراسیکیوشن کے مطابق ملزمان اضاخیل کے سرکاری گودام میں تعینات تھے اور دیگر ملزمان کے ساتھ مل کر گودام سے 30 ہزار سے زائد گندم کی بوریاں غائب کیں، جس سے قومی خزانے کو 19 کروڑ روپے کا نقصان پہنچا۔اینٹی کرپشن حکام کے مطابق انکوائری کے بعد چھ ملزمان کے خلاف مقدمہ درج کیا گیا تھا، اور دونوں ملزمان کو حراست میں لے لیا گیا تھا۔عدالت نے فریقین کے دلائل سننے کے بعد دونوں ملزمان کی ضمانت کی درخواست مسترد کرتے ہوئے انہیں جیل بھیجنے کا حکم دے دیا۔