محمد عامر نے آئی پی ایل کھیلنے سے متعلق خبروں پر خاموشی توڑ دی

لاہور( سپورٹس ڈیسک) قومی ٹیم کے سابق فاسٹ بالر محمد عامر نے انڈین پریمیئر لیگ (آئی پی ایل) کھیلنے سے متعلق خبروں پر خاموشی توڑ دی۔محمد عامر ان دنوں ایک نجی ٹی وی کی چیمپئنز ٹرافی ٹرانسمیشن میں شریک ہو رہے ہیں۔ گزشتہ روز پروگرام کے دوران میزبان نے محمد عامر سے سوال کیا کہ وہ جلد برطانوی پاسپورٹ حاصل کرنے کے بعد انڈین پریمیئر لیگ کھیلنے کا ارادہ رکھتے ہیں، تو آپ کا کیا خیال ہے؟سابق فاسٹ بالر نے جواب دیا کہ اگر مجھے اگلے سال تک انڈین پریمیئر لیگ کھیلنے کا موقع ملا تو میں ضرور کھیلوں گا۔میزبان نے پھر ان سے پوچھا کہ جب پاکستان میں آئی پی ایل کھیلنے پر تنقید کی جائے گی، تو آپ کا ردعمل کیا ہوگا؟ اس پر محمد عامر نے کہا کہ میں انٹرنیشنل کرکٹ سے ریٹائر ہو چکا ہوں۔انہوں نے مزید کہا کہ پاکستانی کرکٹرز پر آئی پی ایل میں پابندی تھی، لیکن ہمارے سابق کرکٹرز کمنٹری کر رہے تھے اور فرنچائز کے کوچ بھی بنے ہوئے تھے، اس پر کوئی سوال نہیں اٹھایا گیا۔