فیفا ورلڈ کپ 2026ء کی میزبانی کیلئے امریکہ میں نئی ٹاسک فورس قائم

واشنگٹن( سپورٹس ڈیسک) امریکی صدر ڈونلڈ ٹرمپ نے فیفا ورلڈ کپ 2026 کی تیاریوں کے لیے وائٹ ہاس میں ٹاسک فورس قائم کرنے کا اعلان کیا ہے اور ایگزیکٹو آرڈر پر دستخط کر دیے ہیں۔صدر ٹرمپ نے کہا کہ یہ ایونٹ سب سے بڑا ایونٹ ہوگا اور وہ اس میں شرکت کا ارادہ رکھتے ہیں۔ ان کا کہنا تھا کہ اس ایونٹ سے 40 ارب ڈالر سے زائد کا معاشی اثر پڑے گا۔ مزید برآں، امریکا پہلی بار کلب ورلڈ کپ 2025 کے لیے بھی تیار ہے۔ ٹرمپ اور فیفا کے صدر نے کلب ورلڈ کپ کی ٹرافی کے ڈیزائن کی رونمائی بھی کی۔غیر ملکی میڈیا کی رپورٹ کے مطابق، یہ ٹورنامنٹ امریکا، کینیڈا اور میکسیکو میں مشترکہ طور پر منعقد ہوگا، جس میں 48 ٹیمیں حصہ لیں گی اور 104 میچز کھیلے جائیں گے۔ فائنل میچ 19 جولائی 2026 کو نیوجرسی کے میٹ لائف سٹیڈیم میں کھیلا جائے گا۔امریکی صدر ڈونلڈ ٹرمپ اس ٹاسک فورس کی سربراہی خود کریں گے، جبکہ نائب صدر جے ڈی وینس اس کے نائب سربراہ ہوں گے۔ یہ ٹاسک فورس وفاقی حکومت کی مختلف ایجنسیوں کے تعاون سے ٹورنامنٹ کی سکیورٹی اور منصوبہ بندی کی نگرانی کرے گی۔میڈیا رپورٹس کے مطابق، فیفا ورلڈ کپ کے دوران 100 ملین سے زائد سیاحوں کی آمد متوقع ہے اور فائنل میچ کے دوران تقریبا 2 بلین سے زائد لوگ ایونٹ کو دیکھیں گے۔ اس ایونٹ کی میزبانی کے دوران دو لاکھ نوکریاں بھی پیدا ہوں گی۔