سینیٹ اجلاس: خواتین کو مساوی حقوق دینے کی قرارداد منظور

اسلام آباد( اباسین خبر)سینیٹ نے یوم نسواں کی مناسبت سے خواتین کے حقوق کے لیے قرارداد متفقہ طور پر منظور کر لی، جس میں کم عمری کی شادی پر پابندی لگانے، خواتین کو مساوی حقوق دینے اور غیرت کے نام پر قتل کی سزاں کو سخت کرنے کا مطالبہ کیا گیا۔ایکسپریس نیوز کے مطابق سینیٹ کا اجلاس چیئرمین یوسف رضا گیلانی کی زیر صدارت منعقد ہوا۔ یوم نسواں پر سینیٹ میں قرارداد پیش کی گئی جو کہ سینیٹر شیری رحمان نے پیش کی۔قرارداد میں کہا گیا کہ خواتین کی معاشی ترقی کے لیے حکومت کو کردار ادا کرنا چاہیے، خواتین کی کم عمری میں جبرا شادی کو روکا جائے، خواتین کو ملازمتوں میں برابر کی تنخواہیں اور مواقع دئیے جائیں، خواتین کو زراعت سے متعلق سہولیات دی جائیں، خواتین کو ہنر کی تعلیم فراہم کی جائے، خواتین کو کاروبار سے متعلق سہولتیں دی جائیں، اور خواتین کو اپنی صحت سے متعلق فیصلوں کا حق دیا جائے۔قرارداد میں یہ بھی کہا گیا کہ خواتین کو قانونی حقوق اور انصاف کی بروقت فراہمی یقینی بنائی جائے، صنفی بنیاد پر تشدد اور کام کی جگہ پر ہراسانی کے خلاف سخت کارروائی کی جائے، غیرت کے نام پر جرائم پر ملزمان کے خلاف قانونی کارروائی کی جائے اور سخت سزائیں دی جائیں، خواتین کی قیادت اور کاروبار میں شمولیت بڑھانے کے لیے اسکالرشپ اور رہنمائی پروگرام متعارف کرائے جائیں، خواتین کے لیے محفوظ ٹرانسپورٹ، چائلڈ کیئر اور ڈیجیٹل وسائل کی دستیابی یقینی بنائی جائے، خواتین کو زراعت اور خوراک کی پیداوار میں شامل کرنے کے لیے زمین کے حقوق اور مالی معاونت دی جائے۔قرارداد میں یہ بھی کہا گیا کہ لڑکیوں کی معیاری تعلیم، ڈیجیٹل رسائی اور ہنر سازی کے مواقع میں اضافہ کیا جائے، خواتین کھلاڑیوں کے لیے سرمایہ کاری اور کھیلوں میں مساوی مواقع فراہم کیے جائیں، خواتین کے فن، ادب اور ثقافتی صلاحیتوں کو فروغ دینے کے لیے حکومتی سرپرستی دی جائے، امتیازی سلوک کے خلاف سخت قوانین اور مساوی تنخواہ کے اصولوں کو نافذ کیا جائے، اور خواتین کی آواز کو میڈیا اور پالیسی سازی میں مزید مضبوط کیا جائے۔سینیٹر شیری رحمان نے کہا کہ خواتین کے مقدمات میں پراسیکیوشن سست روی کا شکار ہے اور سندھ کلب میں خواتین کو ووٹ ڈالنے کی اجازت نہیں ہے، جو کہ ایک شرمناک عمل ہے۔ انہوں نے کہا کہ اگر کسی اور جگہ پر بھی عورتوں کو ووٹ کا حق نہیں دیا جاتا تو اس کا بائیکاٹ کیا جانا چاہیے۔بعد ازاں سینیٹ میں یوم خواتین پر قرارداد متفقہ طور پر منظور کر لی گئی۔