آئی ایم ایف سے قرض کی اگلی قسط کیلئے تیکنیکی سطح پر مذاکرات مکمل

اسلام آباد( کامرس ڈیسک)پاکستان اور عالمی مالیاتی ادارہ (آئی ایم ایف) کے جائزہ مشن کے درمیان ایک ارب ڈالر کی اگلی قسط کے لیے جاری تکنیکی سطح کے مذاکرات مکمل ہوگئے ہیں، جبکہ پالیسی سطح کے مذاکرات کا دوسرا مرحلہ پیر کو شروع ہوگا۔ذرائع کے مطابق، آئی ایم ایف مشن کے ساتھ مذاکرات کا پہلا مرحلہ مکمل ہوگیا ہے۔ تکنیکی سطح کے مذاکرات میں جمعے کو خیبرپختونخوا کے نمائندے کی آئی ایم ایف مشن سے ملاقات ہوئی، جس میں خیبرپختونخوا حکومت کی جانب سے معاشی اقدامات پر بریفنگ دی گئی۔خیبرپختونخوا حکومت کے نمائندے نے صوبائی حکومت کی جانب سے زرعی انکم ٹیکس کی قانون سازی کے بارے میں آگاہ کیا اور صوبائی سطح پر محصولات میں اضافے کے لیے کیے گئے اقدامات پر بھی بریفنگ دی۔مذاکرات کے دوران سرکاری افسران کی کارکردگی میں بہتری اور گورننس میں اصلاحات کے حوالے سے بھی تفصیلی جائزہ لیا گیا۔ اب پالیسی سطح پر مذاکرات کا دوسرا مرحلہ پیر سے شروع ہوگا جس میں اقتصادی جائزے اور دیگر پالیسی معاملات پر بات چیت کی جائے گی۔