عمران خان اور بشریٰ بی بی کو جیل میں کھانا نہ دینے کا بیان بے بنیاد ہے: عظمیٰ بخاری

لاہور( اباسین خبر)وزیر اطلاعات پنجاب عظمی بخاری نے کہا ہے کہ بانی پی ٹی آئی اور بشری بی بی کو جیل میں کھانا نہ دینے کا بیان من گھڑت اور بے بنیاد ہے۔مشیر اطلاعات خیبرپختونخوا بیرسٹر سیف کے بیان پر ردعمل دیتے ہوئے لیگی رہنما عظمی بخاری کا کہنا تھا کہ دونوں میاں بیوی کو معمول کے مطابق ان کے کھانے پینے کے لوازمات مہیا کیے جارہے ہیں۔ انہوں نے سوال اٹھایا کہ جو شخص دوپہر 12 بجے اٹھتا ہو، وہ روزہ کیسے رکھ سکتا ہے۔عظمی بخاری نے مزید کہا کہ بانی پی ٹی آئی کو ہفتے میں تین دن گوشت، سبزیاں، دالیں اور چقندر کا جوس مل رہا ہے۔ عمران خان کو کافی، ابلے انڈے اور خشک میوہ جات ملتے ہیں جبکہ بشری بی بی کو جو بھی کھانے کی خواہش ہوتی ہے، وہ فراہم کیا جاتا ہے۔ انہوں نے کہا کہ پشاور میں بیٹھے کسی شخص کو خواب آیا ہے کہ ان کے آقا کو جیل میں کھانا نہیں مل رہا۔عظمی بخاری کا یہ بھی کہنا تھا کہ دو روز قبل ان کی جماعت کے ترجمان نے بانی پی ٹی آئی کی بیماری سے متعلق جھوٹ بولا، جب کہ پمز کے چار سینئر ڈاکٹروں کی ٹیم نے ان کا آدھا گھنٹہ تفصیلی طبی معائنہ کیا اور انہیں مکمل صحت مند قرار دیا۔ انہوں نے کہا کہ جب اس جماعت کے پاس کوئی دوسرا حل نہیں بچتا تو وہ مظلومیت اور ہمدردی کا کارڈ کھیلنا شروع کردیتے ہیں۔