ٹینکر نذر آتش کرنے کے مقدمے میں آفاق احمد کی ضمانت منظور، رہائی کا حکم

کراچی( اباسین خبر)شہر قائد میں ٹینکر جلانے کے کیس میں مہاجر قومی موومنٹ کے چیئرمین آفاق احمد کی درخواست ضمانت منظور کرلی گئی ہے اور انہیں رہائی کا حکم دے دیا گیا ہے۔ایڈیشنل ڈسٹرکٹ اینڈ سیشن جج غربی نے آفاق احمد کی درخواست ضمانت منظور کرتے ہوئے انہیں ایک لاکھ روپے مالیت کے مچلکے جمع کرانے کا حکم دیا۔ آفاق احمد کی 2 مختلف مقدمات میں پہلے ہی ضمانت منظور ہو چکی تھی۔آفاق احمد سرجانی ٹان کے مقدمے میں عدالتی ریمانڈ پر جیل میں تھے، اور انسداد دہشت گردی کی عدالت نے بھی ان کی مزید 2 مقدمات میں ضمانت منظور کرلی تھی۔یاد رہے کہ آفاق احمد کو کراچی پولیس نے 11 فروری کو اشتعال انگیز بیان دینے کے الزام میں گرفتار کیا تھا۔ پولیس کے مطابق، آفاق احمد کے خلاف کورنگی میں مال بردار گاڑیوں کو جلانے کا مقدمہ درج کیا گیا تھا۔