جے یو آئی نے سندھ بھر میں احتجاجی مظاہروں کا شیڈول جاری کردیا

کراچی( اباسین خبر)جے یو آئی نے سندھ بھر میں احتجاجی مظاہروں کا شیڈول جاری کردیا۔مولانا راشد سورو نے بتایا کہ آج سندھ کے تمام اضلاع میں احتجاجی مظاہرے ہوں گے، جن میں سندھ میں ڈاکو راج اور سندھو دریا پر نئے کنالوں کے خلاف احتجاج کیا جائے گا۔ انہوں نے کہا کہ جمعیت علما اسلام عوام کی آواز ہے اور سندھ کے عوام آج سڑکوں پر نکل کر احتجاج کریں گے۔ان کا مزید کہنا تھا کہ حکومت امن و امان کے قیام میں ناکام ہوچکی ہے، عوام بیزار ہوچکی ہے، اور سندھ میں لاکھوں ایکڑ زرعی زمینیں پانی کی کمی کی وجہ سے بنجر ہوچکی ہیں۔ نئے کنالوں کے منصوبے سے سندھ کی زراعت تباہ ہو جائے گی، اور لاکھوں آبادگار اور کسان بے روزگار ہوں گے۔راشد محمود سومرو نے کہا کہ کراچی کے فور منصوبہ پر اربوں روپے خرچ ہو چکے ہیں لیکن تاحال کراچی کے عوام کے مسائل حل نہیں ہو سکے۔ سندھ میں منشیات، کرپشن، دھونس اور انتقامی کارروائیوں کا بازار گرم ہے اور حکومتی رٹ ختم ہو چکی ہے۔ آج عوام سڑکوں پر نکل کر حکومت کے خلاف اپنا فیصلہ سنائیں گے۔انہوں نے مزید کہا کہ اگر مطالبات نہ مانے گئے تو تحریک کو مزید بڑھانے پر غور کیا جائے گا۔