’گوگل پے‘ پاکستان میں رواں سال کس ماہ لانچ ہونے جارہا ہے؟

کراچی ( مانیٹرنگ ڈیسک)گوگل پے، جو کہ ایک عالمی ڈیجیٹل ادائیگی کا پلیٹ فارم ہے، مارچ 2025 کے وسط تک پاکستان میں باضابطہ طور پر متعارف کرایا جائے گا۔ اس حوالے سے ذرائع کے مطابق گوگل نے نومبر 2024 میں اس پلیٹ فارم کو تصدیق فراہم کی، اور یہ ویزا، ماسٹر کارڈ اور مقامی بینکوں کے ساتھ تعاون کے ذریعے پاکستانی صارفین کے لیے دستیاب ہوگا۔یہ ڈیجیٹل سروس پاکستانی صارفین کو اپنے بینک سے جاری کردہ ڈیبٹ اور کریڈٹ کارڈز کو گوگل والیٹ ایپ کے ذریعے گوگل پے سے لنک کرنے کی اجازت دے گی۔ اس کے ذریعے صارفین بغیر کسی کنٹیکٹ کے ڈیجیٹل ادائیگی کی سہولت حاصل کر سکیں گے۔ابتدائی طور پر گوگل ایپ کا لانچ بنیادی طور پر کنٹیکٹ لیس ادائیگیوں پر توجہ مرکوز کرے گا، جبکہ گوگل والیٹ کی مکمل خصوصیات جیسے لائلٹی کارڈز اور پبلک ٹرانسپورٹ پاسز پہلے مرحلے میں دستیاب نہیں ہوں گے۔ذرائع نے بتایا کہ اسٹیٹ بینک آف پاکستان کے مطابق، پاکستان کا ادائیگی کا بنیادی ڈھانچہ سروس کو سپورٹ کرنے کے لیے اچھی پوزیشن میں ہے، جس میں 133,000 پوائنٹ آف سیل (پی او ایس) ٹرمینلز شامل ہیں جن میں سے 99 فیصد پہلے ہی موبائل کنٹیکٹ لیس ادائیگیوں کو سپورٹ کرنے کے لیے مکمل تیار ہیں۔