نواز شریف کے پوتے کی شادی؛ جاتی امرا سج گیا، بھارت سمیت کئی ملکوں کے مہمان شریک

لاہور( اباسین خبر)پاکستان مسلم لیگ ن کے صدر اور سابق وزیراعظم نواز شریف کے پوتے زید حسین نواز کی شادی کی تقریبات جاری ہیں۔ شادی کے سلسلے میں جاتی امرا کو برقی قمقموں سے خوبصورتی سے سجایا گیا ہے، اور شادی کی تقریب میں بھارت سمیت مختلف ممالک سے مہمان شریک ہیں۔آج زید حسین نواز کی بارات جاتی امرا سے رائیونڈ روڈ پر واقع ایک نجی ہوٹل روانہ ہو گی، جس میں قریبی رشتہ دار، غیر ملکی مہمان اور سیاسی شخصیات بھی شرکت کریں گی۔ بارات کی تقریب میں 500 افراد کو مدعو کیا گیا ہے، جب کہ ولیمے کی تقریب کل 29 دسمبر کو جاتی امرا میں ہو گی، جس میں 700 افراد کو مدعو کیا گیا ہے۔قبل ازیں، زید حسین نواز کا نکاح اور رسم حنا بھی جاتی امرا میں منعقد کی گئی تھی۔ شادی کی تقریبات میں امریکا، برطانیہ، سعودی عرب، قطر، عرب امارات اور بھارت سے مہمان شریک ہو رہے ہیں۔ حسین نواز، ان کی فیملی اور بہن اسما ڈار بھی اس خوشی کے موقع پر موجود ہیں۔تقریبات کے دوران مہمانوں کی سکیورٹی کا انتظام پنجاب پولیس کر رہی ہے۔ شادی کی تقریب کے لیے جاتی امرا جانے والی سڑکوں کو بھی خوبصورتی سے سجا دیا گیا ہے، درختوں کو لائٹس سے روشن کیا گیا ہے اور پھولوں کے گملے مختلف جگہوں پر رکھے گئے ہیں تاکہ ماحول کو مزید خوبصورت بنایا جا سکے۔