جھل مگسی جیپ ریلی کا آخری روز، شائقین کی بڑی تعداد اُمڈ آئی

جھل مگسی( سپورٹس ڈیسک)جھل مگسی جیپ ریلی کا آج تیسرا اور آخری روز ہے، سخت سردی کے باوجود شائقین کی بڑی تعداد ریس دیکھنے جھل مگسی پہنچ گئی۔جھل مگسی ڈیزرٹ چیلنج جیپ ریلی کا کوالیفائنگ رانڈ مکمل ہو چکا ہے، جس میں 64 گاڑیاں شامل تھیں، اور چار خواتین ڈرائیورز نے بھی حصہ لیا۔ایونٹ کے آخری روز سب سے پہلے فیصل شادی خیل کی گاڑی ریس کے لیے روانہ ہوئی۔ پری پیڈ کیٹیگری میں 29 ریسر حصہ لے رہے ہیں، جن میں معروف ریسرز نوابزادہ نادر خان مگسی، صاحبزادہ سلطان، اور نوابزادہ جعفر خان مگسی شامل ہیں۔ڈیزرٹ چیلنج ریس کا ٹریک 170 کلومیٹر پر مشتمل ہے، اور ضلعی انتظامیہ کی جانب سے سکیورٹی کے سخت انتظامات کیے گئے ہیں۔ریسر فیصل شادی خیل کا کہنا تھا کہ جھل مگسی کا ٹریک پاکستان کے مشکل ترین ٹریکس میں سے ایک ہے، یہ ایک کھلا ٹریک ہے جہاں گاڑیوں کی رفتار بہت تیز ہو جاتی ہے۔ ان کی کیٹیگری میں 7 سے 8 ریسرز کے درمیان سخت مقابلہ متوقع ہے۔