زمبابوے ویمن ٹیم کا پہلا دورہ پاکستان، کراچی میں سنسنی خیز سیریز شیڈول جاری

کراچی( سپورٹس ڈیسک)زمبابوے ویمنز کرکٹ ٹیم پہلی بار پاکستان کے دورے پر انتیس اپریل کو کراچی پہنچے گی، جہاں وہ میزبان پاکستان خواتین ٹیم کے خلاف چھ میچوں پر مشتمل سیریز کھیلے گی۔سیریز میں تین ایک روزہ اور تین بیس اوورز کے مقابلے شامل ہوں گے، جن کے تمام میچز نیشنل بینک اسٹیڈیم کراچی میں منعقد کیے جائیں گے۔ ایک روزہ میچز تین، چھ اور نو مئی کو کھیلے جائیں گے اور یہ عالمی کرکٹ کونسل خواتین چیمپئن شپ دو ہزار پچیس تا دو ہزار انتیس کا حصہ ہوں گے۔ یہ مقابلے دوپہر ساڑھے تین بجے شروع ہوں گے۔بیس اوورز کی سیریز بارہ، چودہ اور پندرہ مئی کو شیڈول ہے، جبکہ ان میچز کا آغاز رات ساڑھے سات بجے ہوگا۔اس سیریز کو آئندہ عالمی خواتین بیس اوورز عالمی کپ کی تیاری کے لیے نہایت اہم قرار دیا جا رہا ہے، جو بارہ جون سے پانچ جولائی تک انگلینڈ اور ویلز میں کھیلا جائے گا۔دوسری جانب پاکستان خواتین ٹیم عالمی کپ سے قبل آئرلینڈ میں منعقد ہونے والی تین ملکی سیریز میں بھی شرکت کرے گی، جس سے کھلاڑیوں کو مزید بہتر تیاری کا موقع ملے گا۔