پاکستان ویمن ٹیم نے سری لنکا کو شکست دے کر سیریز میں برتری حاصل کر لی

ہمبنٹوٹا( سپورٹس ڈیسک) پاکستان ویمنز کرکٹ ٹیم نے تین ایک روزہ میچوں کی سیریز کے پہلے مقابلے میں سری لنکا کو 5 وکٹوں سے شکست دے کر سیریز میں 0-1 کی برتری حاصل کر لی۔ہمبنٹوٹا میں کھیلے گئے میچ میں سری لنکا کی ٹیم نے پہلے بیٹنگ کرتے ہوئے مقررہ 50 اوورز میں 9 وکٹوں کے نقصان پر 210 رنز بنائے۔پاکستان کی جانب سے نشرہ سندھو نے شاندار بولنگ کا مظاہرہ کرتے ہوئے 3 وکٹیں اپنے نام کیں، جبکہ تسمیہ رباب نے 2 کھلاڑیوں کو پویلین کی راہ دکھائی۔211 رنز کے ہدف کے تعاقب میں پاکستان ویمن ٹیم نے 43 اوورز میں 5 وکٹوں کے نقصان پر مطلوبہ اسکور حاصل کر کے کامیابی اپنے نام کر لی۔پاکستان کی فتح میں گل فیروزہ نے 78 رنز کی عمدہ اننگز کھیل کر نمایاں کردار ادا کیا، جبکہ سدرہ امین نے 57 رنز کی ذمہ دارانہ باری کھیلتے ہوئے ٹیم کی جیت میں اہم حصہ ڈالا۔دونوں ٹیموں کے درمیان سیریز کا دوسرا ایک روزہ میچ ہفتے کو کھیلا جائے گا، جہاں پاکستان کو سیریز اپنے نام کرنے، جبکہ سری لنکا کو مقابلہ برابر کرنے کا موقع ملے گا۔