ڈائریکٹر امر کوشک کی شردھا کپور کو چڑیل کا کردار دینے کی حیرت انگیز وجہ سامنے آ گئی

ممبئی ( اباسین خبر)بالی ووڈ کے معروف ڈائریکٹر امر کوشک نے اداکارہ شردھا کپور کو بلاک بسٹر ہارر فلم استری میں چڑیل کا کردار دینے کی دلچسپ وجہ سے پردہ اٹھایا۔ 2018 میں ریلیز ہونے والی فلم استری کا سیکوئل گزشتہ سال ریلیز کیا گیا، جس نے باکس آفس پر ریکارڈ بزنس کیا۔ دونوں فلموں میں شردھا کپور نے چڑیل کا کردار نبھایا۔امر کوشک نے ایک حالیہ انٹرویو میں بتایا کہ شردھا کپور کی کاسٹنگ کا کریڈٹ فلم کے پروڈیوسر دینیش وجن کو جاتا ہے۔ ان دونوں کی ملاقات ایک فلائٹ میں ہوئی تھی، اور دینیش وجن نے امر کوشک سے کہا کہ شردھا جب ہنستی ہیں تو وہ بالکل استری یعنی چڑیل کی طرح ہنستی ہیں۔ اس کے بعد امر کوشک نے شردھا سے ہنسنے کے لیے کہا اور پھر انہیں اپنی فلم میں کاسٹ کر لیا۔اگرچہ امر کوشک نے شردھا سے معذرت بھی کی، لیکن ان کے اس تبصرے پر شردھا کپور کے مداحوں نے شدید ردعمل دیا اور ہدایت کار کو تنقید کا نشانہ بنایا۔واضح رہے کہ فلم استری 2 نے باکس آفس پر 600 کروڑ بھارتی روپے کا بزنس کیا اور شاہ رخ خان کی “جوان” اور رنبیر کپور کی “اینیمل” جیسی فلموں کو پیچھے چھوڑ دیا۔ اس فلم کی کاسٹ میں اداکار راج کمار را، شردھا کپور، اپرشکتی کھرانہ، ابھیشیک بینرجی اور پنکج تریپاٹھی شامل تھے۔