حکومت خیبر پختونخوا کا دہشت گردی کی روک تھام میں وفاق کے کردار پر برہمی کا اظہار

پشاور( اباسین خبر)خیبر پختونخوا کی حکومت نے دہشت گردی کی روک تھام کے حوالے سے وفاقی حکومت کے کردار پر شدید برہمی کا اظہار کیا ہے۔ مشیر اطلاعات خیبر پختونخوا، بیرسٹر سیف نے اپنے ایک بیان میں کہا کہ دہشت گردی صرف خیبر پختونخوا کا نہیں بلکہ پورے ملک کا مسئلہ ہے، اور وفاقی حکومت اس حوالے سے تمام ذمہ داری صوبے پر ڈال کر خود کو بری الذمہ نہیں کر سکتی۔ انہوں نے کہا کہ وفاقی حکومت دہشت گردی کے معاملے پر غیر سنجیدہ رویہ اختیار کر رہی ہے، جس کے نتیجے میں دہشت گردی میں اضافہ ہو رہا ہے۔بیرسٹر سیف نے مزید کہا کہ وفاقی حکومت نہ تو افغانستان سے مذاکرات کر رہی ہے اور نہ ہی خیبر پختونخوا حکومت کو اس معاملے میں اقدام کرنے کی اجازت دے رہی ہے۔ خیبر پختونخوا حکومت نے افغانستان سے بات چیت کے لیے وفاق کو ٹی او آرز (Terms of Reference) ارسال کیے ہیں، مگر وفاق نے انہیں سرد خانے میں ڈال دیا ہے اور تاحال کوئی پیش رفت نہیں ہوئی۔انہوں نے وفاقی حکومت سے مطالبہ کیا کہ ٹی او آرز کی فوری منظوری دی جائے تاکہ افغانستان کے ساتھ مذاکرات کا عمل شروع ہو سکے۔ مشیر اطلاعات نے یہ بھی کہا کہ خیبر پختونخوا حکومت عوام کے جان و مال کی حفاظت کو اپنی اولین ترجیح سمجھتی ہے اور اس حوالے سے اقدامات اٹھا رہی ہے۔