افغان مہاجرین کو واپس بھجوانے کے منصوبے کا دوسرامرحلہ شروع

اسلام آباد( اباسین خبر)افغان مہاجرین کو واپس افغانستان بھجوانے کے منصوبے کے دوسرے مرحلے کا آغاز کردیا گیا۔وزارت داخلہ کی دستاویز کے مطابق دوسرے مرحلے میں افغان سٹیزن کارڈ رکھنے والوں کو واپس بھجوایا جائے گا، پاکستان میں تقریبا 8 لاکھ افراد اے سی سی کارڈ پر ہیں۔ قانونی طور پر مقیم افغان شہریوں کو بھی اسلام آباد اور راولپنڈی سے نکالنے کی تیاریاں مکمل کر لی گئیں ہیں۔وزارت داخلہ نے وزیراعظم کی زیرصدارت اجلاس کے فیصلوں پر عمل درآمد شروع کردیا ہے، افغان شہریوں کی وفاقی دارالحکومت اور راولپنڈی سے منتقلی کے لیے 31 مارچ کی ڈیڈ لائن دی گئی ہے۔ افغان سٹیزن کارڈ رکھنے والوں کو 31 مارچ تک دوسرے شہروں اور اس کے بعد افغانستان منتقل کیا جائے گا۔دستاویز میں بتایا گیا ہے کہ تیسرے ملک جانے کے خواہشمند افغان شہریوں کے قیام کی اجازت میں 30 جون تک کی توسیع کی جائے گی جبکہ کسی اور ملک کے ویزے کے منتظر افغان شہری بھی اسلام آباد میں نہیں رہ سکتے۔خیال رہے دستاویز میں لکھا گیا ہے کہ خفیہ اداروں کی عملدرآمد رپورٹ وزارت داخلہ ہر 15 روز بعد وزیراعظم آفس کو بھیجے گی، اور اگر ستمبر تک کسی اور ملک نے ویزے نہ دیے تو افغان باشندے غیرقانونی تصور ہوں گے۔