بھارت سے شکست کے بعد قومی ٹیم خاموشی سے اسلام آباد پہنچ گئی

اسلام آباد( سپورٹس ڈیسک)آئی سی سی چیمپئنز ٹرافی میں بھارت کے ہاتھوں شکست کے بعد قومی کرکٹ ٹیم خاموشی سے دبئی سے اسلام آباد پہنچ گئی۔دبئی سے قومی ٹیم کا جہاز پہلے لاہور پہنچا، جہاں چیئرمین پی سی بی سید محسن رضا نقوی اور بورڈ کے عہدیدار اترے، پھر جہاز دوبارہ اڑان بھرا اور اس کی منزل اسلام آباد تھی، جہاں قومی کرکٹ ٹیم اتری۔اس سفر میں غیر معمولی خاموشی تھی، کھلاڑی آپس میں بات چیت نہیں کر رہے تھے۔ بھارت کے خلاف دبئی میں اتوار کو یکطرفہ شکست کے بعد سب کے چہرے مرجھائے ہوئے تھے اور سر جھکے ہوئے تھے۔چیئرمین پی سی بی سید محسن رضا نقوی، جو اس سے قبل کراچی سے دبئی خصوصی طیارے میں سفر کر کے دبئی ٹیم کے ہمراہ پہنچے تھے، اس سفر میں خاصی گہما گہمی تھی، قہقہے اور شور تھا، مگر اس بار گہری خاموشی تھی۔چیئرمین نے دبئی میں کھلاڑیوں کو عشائیے پر بھی مدعو کیا تھا، وہ بھارت کے خلاف میچ سے ایک رات پہلے سٹیڈیم میں کھلاڑیوں کا حوصلہ بڑھانے بھی پہنچے تھے۔ تاہم واپسی پر شکست کے بعد سب کچھ بدل چکا تھا، نہ رویوں میں وہ گرمجوشی تھی اور نہ ہی چہرے پر وہ مسکراہٹ۔واضح رہے کہ آئی سی سی چیمپئنز ٹرافی میں پہلے نیوزی لینڈ اور پھر بھارت کے ہاتھوں شکست کے بعد میزبان اور دفاعی چیمپئن پاکستان ایونٹ سے باہر ہو گیا ہے۔ البتہ پاکستان کرکٹ ٹیم کو اپنا آخری گروپ میچ 27 فروری کو بنگلادیش کے خلاف راولپنڈی میں کھیلنا ہے۔ گروپ اے سے بھارت اور نیوزی لینڈ نے سیمی فائنل کیلئے کوالیفائی کر لیا ہے۔