آئی سی سی ٹی 20 ورلڈ کپ کیلئے پاکستان انڈر 19 ویمن ٹیم کا اعلان

لاہور( سپورٹس ڈیسک)پی سی بی نے آئی سی سی ٹی 20 ورلڈ کپ کے لیے انڈر 19 ویمن ٹیم کا اعلان کر دیا،پاکستان کرکٹ بورڈ (پی سی بی) نے آئی سی سی انڈر 19 ویمن ٹی 20 ورلڈ کپ 2025 کے لیے پاکستانی ٹیم کا اعلان کر دیا ہے۔ قومی سلیکشن کمیٹی نے 15 رکنی سکواڈ کا اعلان کیا، جس کی قیادت کومل خان کریں گی اور ضوفشاں ایاز نائب کپتان ہوں گی۔پاکستان سکواڈ میں شامل کھلاڑیوں میں علیسہ مختیار، اریشہ انصاری، فاطمہ خان، ہانیہ احمر، ماہم انیس، ماہ نور زیب، میمونہ خالد، مناہل، قر العین، راویل فرحان، شہر بانو، طیبہ امداد اور واصفہ حسین شامل ہیں۔آئی سی سی ٹی 20 ویمن انڈر 19 ورلڈ کپ 18 جنوری سے 2 فروری 2025 تک ملائیشیا میں کھیلا جائے گا، جس میں 16 ٹیمیں حصہ لیں گی۔ ٹورنامنٹ میں 4 گروپس ہوں گے، ہر گروپ میں 4 ٹیمیں ہوں گی۔ پاکستان کو گروپ بی میں انگلینڈ، آئرلینڈ اور امریکا کے ساتھ رکھا گیا ہے۔پاکستانی ٹیم اپنا پہلا میچ 18 جنوری کو امریکا کے خلاف کھیلے گی، اس کا 20 جنوری کو انگلینڈ سے مقابلہ ہو گا، جبکہ آخری گروپ میچ 22 جنوری کو آئرلینڈ کے خلاف ہو گا۔پاکستانی ٹیم 31 دسمبر سے 9 جنوری تک کراچی کے حنیف محمد ہائی پرفارمنس سینٹر میں تربیتی کیمپ میں حصہ لے گی، جس کے بعد ٹیم 10 جنوری کو دبئی کے راستے ملائیشیا روانہ ہو گی۔