بلیو اوریجن کا آل ویمن مشن تاریخ رقم کرے گا، کیٹی پیری سمیت 6 خواتین آج خلا کے سفر پر روانہ ہوں گی

واشنگٹن ( مانیٹرنگ ڈیسک)جیف بیزوس کی کمپنی بلیو اوریجن آج ایک تاریخی خلائی مشن کی روانگی کے لیے تیار ہے جس میں 6 خواتین، جن میں امریکی گلوکارہ کیٹی پیری بھی شامل ہیں، خلا کی جانب روانہ ہوں گی۔ یہ مشن نہ صرف تکنیکی لحاظ سے اہم ہے بلکہ سماجی اور علامتی اعتبار سے بھی ایک سنگِ میل ہے، کیونکہ گزشتہ 60 برس میں پہلی بار صرف خواتین پر مشتمل عملہ خلا کی جانب روانہ ہو رہا ہے۔مشن بلیو اوریجن کے نیو شیپرڈ پروگرام کے تحت ہو رہا ہے، جس کا کوڈ NS-31 ہے، اور راکٹ پیر کو ٹیکساس کے لانچنگ پیڈ سے مقامی وقت کے مطابق 8:30 بجے صبح روانہ ہو گا۔ یہ راکٹ تقریبا 11 منٹ کے سفر کے دوران زمین سے 100 کلومیٹر (62 میل) کی بلندی تک جائے گا اور خلا کی بین الاقوامی سرحد کو عبور کرے گا۔ مشن کی قیادت جیف بیزوس کی منگیتر لارن سانچیز کر رہی ہیں، جن کے ہمراہ مشہور پاپ سنگر کیٹی پیری، معروف صحافی گیل کِنگ، شہری حقوق کی علمبردار امانڈا نگوین، ہالی ووڈ فلم پروڈیوسر کریان فلن اور سابق ناسا راکٹ سائنٹسٹ عائشہ بوئے شامل ہیں۔ یہ پہلا موقع ہے جب خواتین پر مشتمل مشن خلا کی جانب روانہ ہو رہا ہے۔