پی ٹی آئی نے ایک بار بھرجلسہ عام کی اجازت کیلئے لاہور ہائیکورٹ سے رجوع کرلیا

لاہور( اباسین خبر)پاکستان تحریک انصاف (پی ٹی آئی) نے 22 مارچ کو مینار پاکستان پر جلسہ کرنے کی اجازت کے لیے لاہور ہائیکورٹ سے رجوع کر لیا ہے۔ پی ٹی آئی کے رہنما اکمل خان باری کی جانب سے دائر کی گئی درخواست میں چیف سیکرٹری پنجاب، ڈپٹی کمشنر لاہور اور دیگر حکام کو فریق بنایا گیا ہے۔درخواست میں پی ٹی آئی کا موقف ہے کہ وہ 22 مارچ کو شام 8 بجے سے رات 12 بجے تک جلسہ کرنا چاہتی ہے، اور یہ کہ آئین پاکستان کے تحت انہیں جلسہ اور ریلی کرنے کا حق حاصل ہے۔ درخواست میں مزید کہا گیا ہے کہ انتظامیہ نے جلسے کی درخواست پر فیصلہ نہیں کیا، اس لیے عدالت سے استدعا کی گئی کہ وہ ڈپٹی کمشنر لاہور سمیت دیگر حکام کو فیصلہ کرنے کا حکم دے اور جلسہ کرنے کی اجازت دے۔