ماورا حسین نے بالی ووڈ کے دو بڑے سپر اسٹارز کیساتھ کام کرنے کی خواہش کا اظہار کردیا

کراچی ( شوبز ڈیسک)پاکستانی شوبز انڈسٹری کی معروف اداکارہ اور ماڈل ماورا حسین نے بالی ووڈ کے دو بڑے سپر اسٹارز سلمان خان اور رنبیر کپور کے ساتھ کام کرنے کی خواہش کا اظہار کیا ہے۔ ایک حالیہ انٹرویو میں، ماورا حسین نے بھارتی میڈیا کو بتایا کہ وہ سلمان خان اور رنبیر کپور کے ساتھ فلموں میں کام کرنے کی آرزو رکھتی ہیں۔ماورا نے اپنی 2016 میں ریلیز ہونے والی فلم “صنم تیری قسم” کی کامیاب دوبارہ ریلیز پر خوشی کا اظہار کرتے ہوئے کہا کہ جو کچھ تقدیر میں ہوتا ہے، وہی ملتا ہے۔ سلمان خان کے بارے میں بات کرتے ہوئے، ماورا نے کہا کہ وہ ان کی کئی فلمیں دیکھ چکی ہیں، خاص طور پر “ہم دل دے چکے صنم”، جو ان کی پسندیدہ فلموں میں سے ہے۔ماورا نے مزید کہا کہ وہ چاہتی ہیں کہ سلمان خان کبھی ریٹائر نہ ہوں اور اگر انہیں موقع ملے تو وہ سلمان خان کے ساتھ فلم میں کام کرنا چاہیں گی۔ اس کے علاوہ، ماورا نے رنبیر کپور کے ساتھ ان کی فلم “راک اسٹار” کی طرز پر کسی فلم میں کام کرنے کی خواہش کا بھی اظہار کیا۔یاد رہے کہ ماورا حسین نے بالی ووڈ میں 2016 میں اپنی فلم “صنم تیری قسم” سے ڈیبیو کیا تھا اور اس کے بعد ان کے مداحوں کی جانب سے ان کی فلم کے سیکوئل میں ان کو دیکھنے کی خواہش کی جاتی رہی ہے۔