ڈائریکٹر جنرل نیب خیبر کی تعیناتی کیخلاف دائر درخواست، مختصر حکمنامہ جاری کردیا

پشاور( اباسین خبر)پشاور ہائیکورٹ نے ڈائریکٹر جنرل نیب خیبرپختونخوا کی تعیناتی کے خلاف دائر درخواست پر مختصر حکم نامہ جاری کر دیا ہے۔ عدالت نے نیب کے 4 فروری کے اعلامیہ کو معطل کرتے ہوئے ڈائریکٹر انوسٹی گیشن نیب خیبرپختونخوا کا تبادلہ روکا ہے۔حکم نامے کے مطابق، درخواست گزار جو نیب خیبرپختونخوا میں ڈائریکٹر انویسٹی گیشن تعینات ہیں، نے ڈی جی نیب کی تعیناتی کو ہائیکورٹ میں چیلنج کیا تھا۔ اس کے بعد درخواست گزار کو خیبرپختونخوا سے نیب راولپنڈی منتقل کیا گیا، اور 4 فروری کو ان کے خلاف ایک اور انکوائری شروع کی گئی۔مختصر حکم نامے میں عدالت نے 30 جنوری کو فریقین کو درخواست گزار کے خلاف تادیبی کارروائی سے روک دیا تھا، لیکن اس کے باوجود 4 فروری کو درخواست گزار کا تبادلہ کر دیا گیا اور ان کے خلاف انکوائری بھی شروع کی گئی۔درخواست گزار کے وکیل نے عدالت کو بتایا کہ عدالتی احکامات کے باوجود درخواست گزار کے خلاف تادیبی کارروائی کی گئی۔ نیب کے وکلا نے عدالت کو بتایا کہ درخواست گزار نے راولپنڈی میں اپنے عہدے کا چارج سنبھال لیا ہے، تاہم فریقین نے عدالتی احکامات کو نظر انداز کرتے ہوئے ان کا تبادلہ کیا اور انکوائری شروع کی۔پشاور ہائیکورٹ نے 4 فروری کے تبادلے کا اعلامیہ معطل کرتے ہوئے حکم دیا کہ درخواست گزار کو نیب خیبرپختونخوا میں کام کرنے کی اجازت دی جائے اور فریقین درخواست گزار کے خلاف جاری انکوائری کا فیصلہ اگلی پیشی تک جاری نہ کریں۔