چین اور پاکستان میں گدھا صنعت کے فروغ کیلئے 10 سالہ معاہدہ

گوادر( اباسین خبر) چین کی معروف کمپنی ڈونگ ای ایجیاو نے پاکستان میں گدھا صنعت کے فروغ کے لیے ہانگینگ گروپ کو اپنا واحد اسٹریٹجک شراکت دار قرار دیتے ہوئے 10 سالہ تعاون کے معاہدے پر دستخط کردیے۔چینی شہر لیاؤچینگ میں ہونے والے معاہدے کے تحت پاکستان گدھا صنعت تحقیقی مرکز اور گدھا پائیدار ترقی و بہبود کے فروغ کے یونٹ قائم کیے جائیں گے۔ دونوں ادارے پاکستان میں گدھا صنعت کو سائنسی، معیاری، قابلِ سراغ اور پائیدار بنیادوں پر استوار کرنے کے لیے مشترکہ اقدامات کریں گے۔ہانگینگ گروپ کے مطابق پاکستان میں گدھوں کی منتخب افزائش، فارمنگ، معاہداتی پرورش، جانوروں کی نگرانی و شناخت، ذبح و پراسیسنگ اور چین کو برآمدات پر مشتمل مربوط نظام پہلے ہی قائم کیا جاچکا ہے۔معاہدے کے تحت نسلوں میں بہتری، جانوروں کی غذائیت، بیماریوں کی روک تھام، معیار کے تعین اور سپلائی چین کی ترقی کے لیے مشترکہ تحقیق کی جائے گی۔ گدھا صنعت سے متعلق ایک مشترکہ تجربہ گاہ میں بھی سرمایہ کاری کا منصوبہ ہے۔دونوں ممالک فارموں کی رجسٹریشن، افزائش نسل کے ریکارڈ، بیماریوں کی نگرانی، ویٹرنری سرٹیفکیشن، قرنطینہ اور جانوروں کی قابلِ سراغ شناخت کے نظام کو بہتر بنانے کے لیے تعاون کریں گے تاکہ چین کو ضابطوں کے مطابق برآمدات آسان بنائی جاسکیں۔معاہدے میں افزائش نسل کی جدید ٹیکنالوجی، خوراک و غذائیت، بیماریوں سے تحفظ اور ذبح و پراسیسنگ کی سہولیات کو جدید خطوط پر استوار کرنا بھی شامل ہے۔