پنجاب اسمبلی میں ایران میں 8 پاکستانیوں کے قتل کے خلاف مذمتی قرارداد جمع

لاہور( اباسین خبر)پنجاب اسمبلی میں ایران کے صوبے سیستان میں 8 پاکستانیوں کے قتل کے خلاف ایک مذمتی قرارداد جمع کروا دی گئی۔ قرارداد مسلم لیگ (ن) کی رکن حنا پرویز بٹ کی جانب سے پیش کی گئی۔قرارداد کے متن میں کہا گیا کہ 8 پاکستانیوں کو بیدردی سے قتل کیا گیا ہے اور یہ ایوان ان قتل کی شدید مذمت کرتا ہے۔ قتل ہونے والے پاکستانی مزدوروں کا تعلق پنجاب سے تھا اور ان کے قتل میں دہشت گرد عناصر ملوث ہیں جو پاک ایران تعلقات کو سبوتاژ کرنے کی کوشش کر رہے ہیں۔قرارداد میں ایران سے مطالبہ کیا گیا کہ فوری طور پر 8 پاکستانیوں کے قاتلوں کو گرفتار کر کے پاکستان کے حوالے کیا جائے تاکہ انصاف کا عمل مکمل ہو سکے۔